Redaktie

Oflopen deensdag hebben de leerlingen van de basissschoele ’t Holtpad van Ni’jhooltpae een kuier maekt deur een diel van heur dorp. Ze wodden daorbi’j in drie groepen opdield en begeleid deur dörpsgids Geert Lantinga uut Wolvege. D’r was veural andacht veur oolde gebouwen zoas et dörpskefé ‘De Schieve Deure’, et eerste schoelegebouw en de vroegere botterfebriek.  Veerder wodde mit de kiender uutgebreid van gedaachten wisseld over de naeme van et dörp, de schoele en et Multifunktioneel Centrum. Tiedens de kuier weren d’r  foto’s om de kiender et heden en verleden mit mekeer vergelieken te laoten.

Veul ommedaenken was d’r veur de verhaelen rond et staandbeeld ‘De Takkemaeker’. Lantinga vertelde daorover an de haand van echte takkebossen, talhoolties, stekpaolties en een bessem van barkeries. Zoks maekte uteraord hiel veul indrok bi’j de leerlingen.

In de Weembosch wodde stillestaon bi’j de oolderdom van de juust kapte dennebomen. D’r wodde mitien hiel wat materiaol mitneumen veur de haasttaofel in de schoele.

Alle leerlingen en Geert Lantinga vunnen et een meraokels mooie dag, waor ok nog even et thema van de kienderboekeweke ‘Veur altied jong’ an de odder kwam.

De Stellingwarver Schrieversronte orgeniseert en bödt dörpskuiers en netuurexkursies an Stellingwarver basisschoelen an in et kader van et vak Hiemkunde in et basisonderwies.

Bovenste foto’s: D’r is veul hiemkundig lesmateriaol te zien in de pebliekshal van et gemientehuus in Wolvege. Op ‘e foto daoronder vertelt de heer Jan de Vries over de biezunderheden van et vak Hiemkunde in et basisonderwies. (Foto’s: Lenus v.d. Broek)

Oktober is de Maond van de Geschiedenis. In de pebliekshal van et gemientehuus van West-Stellingwarf in Wolvege is daoromme een tentoonstelling te zien van archiefstokken over de Hiemkundelessen die sund 1988 op ‘e Stellingwarver basisschoelen geven wodden.
Op vri’jdag 14 oktober wodde de tentoonstelling om 14.00 ure officieel eupend en gaf de heer Jan de Vries daornao een lezing over dit onderwarp in de raodszael. De heer De Vries was indertied heufd van de ofdieling onderwies van de gemiente en nauw betrokken bi’j et opzetten en invoeren van et vak Hiemkunde. Dat laeste was per 1 augustus 1988 op ‘e Stellingwarver basisschoelen.

Een wieziging van de wet leidde d’r in 1974 toe dat in de hiele perveensie Frieslaand et Fries as verplicht leervak invoerd wodden zol op alle legere scholen. Mit ingang van et schoelejaor 1980-1981 mos in et leerplan van de schoelen et vak Fries opneumen wezen. In de Stellingwerven leidde dat tot flink wat onrust.
Nao veul striederi’je en overleg tussen gemienten, schoelebesturen en de perveensie kreeg de regio uuteindelik ontheffing van de Friese verplichting en wodde et vak Hiemkunde invoerd. Dat, ok verplichte, vak zol vanof doe bestaon gaon uut zes heufdthema’s, en iene daorvan is de tael. De Stellingwarver Schrieversronte zorgt sund 1988 veur Stellingwarfstaelig lesmateriaol en lessen over de Stellingwarver streekkultuur.

Op veurdracht van de jury kent et bestuur van de Stellingwarver Schrieversronte de H.J. Bergveldpries 2016 toe an Freddie de Vries en Ruurd Jelle van der Leij, schriever en fotograaf van Et Stellingwarver Voegelboek. Bi’j Et Stellingwarver Voegelboek gaot et om een boek waor de voegels in beschreven wodden die in et gebied Stellingwarf veurkommen of veurkommen kunnen. De dudelike, toegaankelike wieze van et beschrieven van al die voegels, et prachtige fotomateriaol en een register mit naost de Stellingwarver naemen ok de naemen in et Nederlaans en Latien maekt dit boek biezunder en uniek.

Freddie de Vries (links) en Ruurd Jelle van der Leij vlak nao de prissentaosie van heur boek (foto: Marije Kuiper)

De H.J. Bergveldpries wodt toekend an personen of an instellings die heur inzetten, of inzet hebben, om et Stellingwarfs en de Stellingwarver streekkultuur uut te dregen, in schrift of op een aandere wieze. In heur besluut te kiezen veur Et Stellingwarver Voegelboek volgt et bestuur van de Stichting Stellingwarver Schrieversronte de unanieme veurdracht van de jury.

Et is de eerste keer dat de Schrieversronte disse eervolle pries, bestaonde uut een geldbedrag en een penning, uutrikken zal. Et doel is om dat iens in de zes jaor te doen.

Eerder rikten de Stellingwarver gemienten Oostaende en Westaende de pries om toerbeurt uut.

De uutrikkinge zal wezen op maendagaovend 17 oktober in et gebouw van de Schrieversronte in Berkoop. De bi’jienkomst is veur geneudigden.