Redaktie

GEEF JE OP VEUR STELLINGWARFPOP!

door

STELLINGWARFPOP OP ZAOTERDAG 9 NOVEMBER

Zoas eerder al ankondigd wodde is de zesde edisie van Stellingwarfpop op zaoterdagaovend 9 november. Et festival is dit keer binnen en dat is in et dörpshuus van Makkinge. Ondertussen hebben heur de eerste bands en singer-songwriters al anmeld en daor is de veurbereidende kemmissie vanzels ommeraek bliede mit. Tiedens et festival zal d’r ok een optreden wezen van de winners van Stellingwarfpop 2012, dat weren Serge Epskamp en Erwin van de Ven. Zi’j wunnen et festival doe mit et schitterende lietien ‘Laeste volle maone’.

DSC_2319

Serge Epskamp en Erwin van de Ven (links) wunnen Stellingwarfpop 2013 (foto: Lenus van der Broek)

Stellingwarfpop 2013 zal prissenteerd wodden deur Fons Herder uut Grunningen, mar van oorsprong van Oosterwoolde. Fons is veural bekend as zanger van de band ‘A liquid landscape’, een band die geweldig an de weg timmert. Tiedens et eerste Stellingwarfpop wun Fons mit Mukusha (een gelegendhiesfermaosie van him en zien meziekmaoten Niels en Robert van Dam), mit et prachtige, akoestisch uutvoerde  ‘Mooie dingen’  de twiede pries.

Op dit mement is ok de jury bekend, die bestaot krek as veurig jaor uut de leden Robert van Dam (uut Grunningen, bassist/gitarist ‘A liquid landscape’), meziekkenner/muzikaant Klaas Ozinga uut Makkinge en Peter Riksma (Zaandpol, neerlandikus en kenner van et Stellingwarfs, bestuurslid Stellingwarver Schrieversronte).

Om mitdoen te kunnen moet elke dielnemer op zien minst ien Stellingwarfstaelig lietien naor veuren brengen. Dat lietien moet oorspronkelik wezen, dat gelt niet alliend veur de tekst, mar ok veur de meziek. Vertaelings kommen niet in anmarking veur de priezen, mar meugen vanzels wel tiedens de optredens bruukt wodden. De priezen bestaon ok dit jaor weer uut drie geldpriezen: de eerste preis is € 250,00, de twiede € 125,00 en de dadde € 75,00.

Wie graeg mitdoen wil: je opgeven kan bi’j de Stellingwarver Schrieversronte in Berkoop. Dat kan deur even te mailen naor info@stellingwarfs.nl. Bellen kan ok, et tillefoonnr. is 0516-451108, dan even vraogen naor Sietske Bloemhoff.

 

Facebook event: https://www.facebook.com/events/172832882876548/

 

Prissentaosie ‘Bergveld lest veur uut eigen wark’

door

Op 22 meert was in et gebouw van de Stellingwarver Schrieversronte de prissentaosie van et boek Bergveld lest veur uut eigen wark. Et eerste exemplaor van dit biezundere boek wodde uutrikt an Hans Gerritsen, hi’j is de ni’je veurzitter van de Nedersaksische streektaelorgenisaosie SONT. Et twiede en dadde exemplaor was veur Piet en Jan Harmens Bergveld, zeunen van de in 1966 overleden belangriekste schriever in et Stellingwarfs van veur de oprichting van de Stellingwarver Schrieversronte.

DSC_2007 (1)

Bergveldkenner Henk Bloemhoff verzaemelde alle in et 320 bladzieden dikke boek opneumen wark van Hendrik Johannes Bergveld, en schreef de inleiding.

DSC_2016

Schrieversronte-veurzitter Ype Dijkstra overhaandigde de eerste exemplaoren van et ni’je boek. Links Hans Gerritsen, rechts Jan Harmens en Piet Bergveld.

DSC_2024

SONT-veurzitter Hans Gerritsen is vandaege-de-dag borgemeister van Haoksbargen. Eerder was hi’j dippeteerde van de perveensie Grunningen en zette him ok doe al in veur de veerdere erkenning van et Nedersaksisch. Ok op dit mement spant hi’j him, tegere mit o.e. dippeteerde Rein Munniksma van de perveensie Drenthe, opni’j in veur die zo belangrieke erkenning.  

DSC_2021

Jan Harmens en Piet Bergveld toonden heur ommeraek inneumen mit et verschienen van ‘Bergveld lest veur uut eigen wark’. Op et schoelebod aachter heur is et reklamebiljet te zien t.b.v. ‘De oolde pook’, et eerste boek in et Stellingwarfs mit riempies en verhaelen van H.J. Bergveld. Et boek verscheen in 1971 en wodde uutgeven deur de Kulturele Raod van Oost-Stellingwarf. Een jaor laeter wodde de Stellingwarver Schrieversronte opricht.

DSC_2012

Tiedens de inleiding van dr. Henk Bloemhoff op 22 meert angaonde et wark van Hendrik Johannes Bergveld las Femmie van Veen van Hooltpae gedichten en fragmenten van verhaelen uut et ni’je boek veur.

Bovenstaonde foto’s wodden maekt deur Lenus van der Broek.

Een uutvoeriger verslag over disse biezundere middag is te lezen op de webstee www.stellingwarfs.nl. Et ni’je boek telt 320 bladzieden, is veurzien van een had kaft en kost €19,50.

Warkwinkel Veurlezen het goed voldaon

door

image4-001

Schriefster Riemkje Hoogland het tal van tips angaonde et veurlezen uut Tomke an ukken.

Kotleden wodde in et gebouw van de Schrieversronte in Berkoop een warkwinkel ‘Veurlezen’ holen. Die warkwinkel wodde alle vri’jwilligers die mitdoen an de verschillende Stellingwarver veurleesakties anbeuden deur It Selskip foar Fryske Schriftekennisse. Dit ‘Selskip’ orgeniseert al sund jaor en dag de Friese veurleesweke in juni; in die weke wodt veural veurlezen an ukken uut et boekien ‘Tomke’ dat jaorliks verschient. De Schrieversronte het him een jaor of wat leden bi’j disse prachtige aktie ansleuten en ok in zowat alle Stellingwarver ukkespeulplakken en plakken veur kienderopvang wodt in juni uut Tomke veurlezen. De Schrieversronte stelt ok al weer zoe’n zeuven jaor et Tomke-boekien, dat uutgeven wodt deur de Afûk, veur alle ukken beschikber. Veur de Stellingwarver vertaeling van Tomke zorgt Sjoukje Oosterloo uut Drachten. De veurleesaktie wodt in Oost-Stellingwarf koördineerd deur Akkie Zeilstra van Raevenswoold, wiels Wikje Haan uut Oosterwoolde de orgenisaosie in West-Stellingwarf veur heur rekening nemt.

image0-002

Geeske Frieswijk (links) van It Selskip faor Fryske Schriftekennisse is dé grote moter aachter et Tomke-veurleesaktie in juni

Tiedens de warkwinkel vertelde schriefster Riemkje Hoogland over waor as veurlezers allemaole mit te maeken kriegen kunnen. Wat doej’ as kiender inienen ofleided binnen, en waor moej’ rekening mit holen as et om de alderkleinsten gaot. ‘Maek gebruuk van verschillende aorige attributen,’ raodde ze an. ‘Dit jaor is et thema van et ni’je Tomke-boekien ‘Keunst’, maek bi’jglieks gebruuk van een mooie ‘Keunstdeuze’, waor van alles inzitten kan.’

image2-001

Wat et ok altied goed dot, is de een ‘verteljasse’, daor aj’ van alles in verbargen kunnen, en die aj’ de hieltied anpassen kunnen naor et thema, of naor et seizoen:

image9-001

Nao heur uutleg en tips zette Hoogland de veurlezers an et wark, in groepies van twieje mossen stokken tekst uut speciaol uutzochte Stellingwarver verhaelen veurbereided wodden.

image5-001

image8-001

image3-001

Daornao  lazzen alle veurlezers heur stokkies tekst die in twietallen veurbereided weren an mekaander veur en wodden veural alle goeie veurbeelden daoruut be- en toelocht. Want et wodde mitien dudelik dat d’r an de Stellingwarver veurleesakties arg goeie veurlezers mitdoen… Van de kaante van Frieswijk en Hoogland was daor dan ok ommeraek veul wardering veur. An et aende van de warkwinkel bleek dat alle goeie veurleestips, alle idenen om et hiele gebeuren henne, en et mit mekeer uutwisselen van erverings de veurlezers arg goed voldaon het. Et ligt dan ok in de bedoeling om mit een jaor opni’j een Warkwinkel Veurlezen te orgeniseren. Mit een peer weken verschient et alderni’jste Tomke-boekien.

Foto’s: Sietske Bloemhoff

 

Sluut alle deuren mar

door

Harmen Houtman

‘Sluut alle deuren mar’

 

Refrein:

Sluut alle deuren mar,

doe alle raemen toe,

kom bi’j me zitten, hier dicht’ bi’j de heerd.

‘k Doe alle keerzen an,

‘k zet volle glaezen klaor,

kom we genieten en jow bin et weerd.

          Dichter dan dichterbi’j,

          en hiel vertrouwd veur mi’j,

          jow en ik saemen, dus wat wi’j’ nog meer…

 

1.

Buten is ’t koold

en buten is ’t drok,

ziej’ daor de wereld.

die zocht naor ’t gelok.

Tegen mi’j an

zo veilig en teer,

‘k vuul je oprechte vertrouwen hieltied meer.

2.

Buten is haost,

geveer en geweld,

ziej’ ze strieden

om macht en om geld?

Wees mar niet bang’

kroep tegen mi’j an,

geef me je waarmte zo lang’ as et kan.

 

Refrein II

Koester mien woorden mar,

vuul al mien strelen mar,

laot je mar zweven deur keerslocht en klaank.

Sluut beide ogen mar,

droom alle dromen mar,

soeze mar vot hier bi’j mi’j op ‘e baank.

          Dichter dan dichterbi’j,

          en hiel vertrouwd veur mi’j,

          d’r is mar ien woord en dat is van ‘daank’.

 

(De wieze van et refrein: ‘Sluit alle deuren maar’, uut de musical ‘Joseph and his amazing technicolor dreamcoat’)