Jong van hatte mit et Stellingwarfs de toekomst in
Alle mitwarkers van StellingPlus weensken jim, mit et onderstaonde en zo mooie gedicht van Lamkje Hof-de Boer, alle meugelike goeds toe veur et ni’je jaor 2015!
Aende en begin
Al weer een jaor veurbi’j
ontdaon an de iewighied
en overal liggen de brokstokken van de tied
as brakken van vergaank’likhied
waor bloemen tussen bluuien
van geloven
en dan opni’j weer hopen
en vertrouwen
op een ni’j begin
(Uut: ‘Van mien kaant bekeken’, Lamkje Hof-de Boer, Stellingwarver Schrieversronte, 1981)
Berkoop. Op deensdagmiddag 30 december is d’r in et pergramme ‘Plein 5’ van de NCRV ommedaenken veur de Stellingwarver schriefster Lamkje Hof-de Boer (1908-1991). Et pergramme is te beluusteren op Radio 5 Nostalgia tussen 14.00 en 16.00 ure.
Plein 5 het altied veul andacht veur de kultuur uut de verschillende regio’s; mit naeme gelt dat ok veur de (biezunderheden) van de streektaelen.
Lamkje Hof-de Boer het veur et Stellingwarfs altied een belangrieke vertegenwoordigster west. Al veurdat de Stellingwarver Schrieversronte opricht wodde schreef Vrouw Hof, zoas ze bi’j veul meensken bekend was en nog altied is, Stellingwarver verhaelties en riempies veur o.e. De Dreijer, et dörpsblad van Berkoop. Doe de Schrieversronte opricht wodde dee Vrouw Hof ok mitien mit an de aldereerste kursus Stellingwarfs veur beginners. Ze schreef al rap bi’jdregen veur et Stellingwarver tiedschrift De Ovend en was ok een belangrieke infermaant veur et Stellingwarfs Woordeboek. In 1981 gaf de Schrieversronte heur dichtbundeltien ‘Van mien kaant bekeken’ uut en in 1986 verscheen heur twiede boek ‘Veur loon en verval’. In dat boek vertelt ze over heur biezundere leven mit veul hoogte-, mar ok dieptepunten. Kotleden gaf SONT (Streektael Orgenisaosie Nedersaksisch Taelgebied) de bloemlezing Gloepends mooie verhalen uit Stellingwerf, Groningen, Drenthe, Salland & Land van Vollenhove, Twente, Achterhoek en de Veluwe uut, mit ok een verhael van Lamkje Hof-de Boer. Et is niet veur et eerst dat de NCRV ommedaenken het veur Vrouw Hof. Al in 1988 wodde deur de omroep een dokementaire uutzunnen over heur biezundere leven, dat was n.a.v. van heur boek ‘Veur loon en verval’.
Op ‘e foto iene van de welkomstbotties bi’j Berkoop, mit teksten van Lamkje Hof-de Boer. (Foto: Sietske Bloemhoff)
Oflopen vri’jdag zorgden de Nedersaksische muzikaanten Jan Henk de Groot (Grunnings) en Serge Epskamp (Aachterhoeks) veur een butengewoon fraai optreden in De Zon in Oosterwoolde. Et optreden was op uutneudiging van de warkgroep ‘Alles rondom taal’ van Stichting Kunstwerf.
Beide singer-songwriters treden mit regelmaot op, en soms ok tegere zoas now in Oosterwoolde et geval was. Goed op mekeer inspeuld en mit een vlotte prissentaosie wodden om en om lieties in et Grunnings en Aachterhoeks naor veuren brocht. Daorbi’j begeleidden beide artiesten mekeer ok op o.e. gitaar en mandoline. De Groot en Epskamp leuten beide lieties van heur cd’s ‘Weer Om’ en ‘Oer’ heuren, mar hadden ok flink wat ni’j wark in heur pergramme. Slim aorig was dat Serge Epskamp – hi’j woont in Zaandhuzen – zien ni’jste lietien ‘Kri’jen op et veld’ in et Stellingwarfs heuren leut.
De warkgroep ‘Alles rondom Taal’ van Stichting Kunstwerf bestaot uut Femke Adams (Bruna Oosterwoolde), Klaasje Herder (biebeltheek Oosterwoolde) en Sietske Bloemhoff (Stellingwarver Schrieversronte).
(Foto’s: Wendy Ritter)
Tiedens Eupen Dag ‘Stellingia.nl’ de locht in
Zaoterdag gong tiedens de Eupen Dag van et Kenniscentrum van de Stellingwarver Schrieversronte de ni’je webstee www.stellingia.nl officieel in gebruuk. Sund zoe’n aanderhalf jaor is een groep van omdebi’j zes aktieve vri’jwilligers van de Stellingwarver Schrieversronte drok in de weer om alle dokementen, foto’s, kollekties en zo wat henne uut dat centrum te digitaliseren om ok op die wieze al dat belangrieke materiaol veur de toekomst goed te beweren. Krek lieke belangriek vint de SSR et liekewel om alle inscande wark mitien ok op de ni’je webstee van et Kenniscentrum te plaetsen. Iederiene kan zo op een makkelike wieze op Stellingia kieken wat d’r in et centrum in Berkoop an gegevens over de streekgeschiedenis en streektael te vienen is. De Schrieversronte vint de ni’je webstee mit naeme ok van belang veur leerlingen van et vervolgonderwies en HBO- en universitaire studenten. De kommende tied zal mit riegelmaot et anbod op Stellingia anvuld wodden. Stellingia.nl is ontwikkeld deur Ninke van der Veen, iene van de jonge mitwarkers van de SSR. Meensken, die naor et Kenniscentrum zels kommen, kun bi’j heur zuukwark gebruuk maeken van de ni’je studiekaemer. In die kaemer is ok een uutgebreide haandbiebeltheek opneumen, d’r staot een komputer veur gebruuk en de ruumte is veurzien van WIFI. Een bezuuk kan alliend op ofspraoke; boeken en eer materiaol uut et Kenniscentrum wo’n niet uutliend. Veur de verni’jingsslag van et Kenniscentrum was d’r bi’j de bezukers an de Eupen Dag ommeraek veul wardering. (Foto: Lenus van der Broek)
Ach, now gong et even zo goed… Stellingwarfstaelige bodden van de perveensie bi’j de anleg van een ni’je retonde bi’j Wolvege. Prachtig, zo heurt et vanzels!!
Mar op meer plakken in Stellingwarf wodt an de wegen warkt, zo ok in Oost-Stellingwarf. Daor komt ommes de zo broodneudige anpassing an de N381! En daorveur moet now tiedelik et fietspad langs de ‘Tsjonger’ ofsleuten wodden! Mar gaot et daorbi’j niet om die unieke revier mit officieel twie unieke naemen?? Iene in et Stellingwarfs (De Kuunder), en iene in et Fries (Tsjonger)?? Zoj’ dan an de Stellingwarver kaante – misschien simpel docht – niet de Stellingwarver naeme ‘De Kuunder’ verwaachten meugen?? Ja, vanzels meuj’ dat verwaachten! Mar… zie de foto! Fuj toch, meensken van de perveensie…