Stellingwarfs in et ‘wild’

Ok in Stellingwarf hej’ boeren die et niet iens binnen mit de ni’je stikstofplannen. Zo staot an de Zeediek, bi’j de splissing mit de Ni’jeweg in et westen van West-Stellingwarf, dit bod. Et gaot hier om een veergezicht over een vlakte van krudenaarme Engels raaigröslanen in de Grote Venepoolder. (Gegevens en foto: Henk Jager)

Nommer 345 in disse serie is de naeme Veurhuus, een appattement in een boerderi’je in Gieteren. Daor wodt trouwens ok vaeke uus in plak van huus zegd en schreven. Een mooi veurbeeld is et prachtige Museum Giethoorn dat de naeme ’t Olde Maat Uus het. Vroeger was op dit plak an et Binnenpad de boerderi’je van de femilie Maat. In et Stellingwarfs van de Stellingwarven bruken we oolde in plak van olde. (Foto’s en tekst: Johan Veenstra)

Ok in et plak De Kuunder bruken ze et Stellingwarfs in et eupenbaor. Zoas bi’j de naeme ’t Kniphuus van disse kapselon. De foto en de gegevens zorgde Henk Jager veur.

Et woord bliede kommen we wel es vaeker tegen in disse serie. En now ok op ‘e greens van De Blesse en Willemsoord. Henk Jager maekte kotleden disse foto.

De Koele is de naeme van et eupenlochttheater in Appelsche. Een foto daorvan plaetsten we al onder nommer 119 van disse serie. Mar… aj’ weer votgaon ziej’ op ‘e toegangspoort een ere mooie tekst in et Stellingwarfs: Mooi da’j west bin’n – gauw weer komm’n. Hiel spietig bin dan vanzels wel de taelfouten die as maekt binnen, et zol Mooi daj’ west binnen – gauw weer kommen wezen moeten. Mar wie wet past de Historische Verieninge van Appelsche die nog es an! Want dat verdient zoe’n mooi initiatief. (Foto: Hans Salverda)