Jong van hatte mit et Stellingwarfs de toekomst in
Fotorebriek Stellingwarfs in et eupenbaor
In Appelsche zit OBB Zeuvenakkers an de Aekingeweg. Hier wodt specialistische behaandeling geven an psychiatrisch kwetsbere meensken mit verstaandelike beparkings. De letters OBB staon veur Orthopedagogische Behaandeling en Begeleiding. (Foto en tekst: Johan Veenstra)
Op ’e ribbe
Op ’e ribbe is de naeme van een huus an de Pieter Stoevezaandweg in Ni’jtriene. Een toepasselike naeme in et Scheenegebied. Een ribbe is een smalle stroke grond tussen twie patten van een venepoele. Zie ok de straotnaeme De Ribbe in Scharpenzeel (nommer 306 in disse serie). (Foto’s en tekst: Johan Veenstra)
Steginge is een buurtschop die dichter bi’j et dörp lag as Nanninge en Praninge. Ie vienen d’r vandaege-de-dag liekewel mar weinig van weeromme. Alliend de straotnaeme Stegingeweg dot nog an de buurtschop daenken. De boerderi’je Steginge lag tussen de Stegingeweg en de Boereweide. De infermaosiebodden wodden indertied deur de Historische Verieninge van Oosterwoolde ontwikkeld en plaetst, in saemenwarking mit de Stellingwarver Schrieversronte. (Foto en tekst: Sietske Bloemhoff)
De buurtschop Praninge lag op et plak daor aj’ now Oosterwoolde uutrieden op de Praningeweg, richting Donkerbroek. De boerderi’je mit de naeme van de buurtschop staot daor nog, links van de weg. Praninge en Nanninge hadden elk twie stemdregende boerderi’jen, zo is op et infermaosiebod te lezen dat vlakbi’j de boerderi’je Nanninge staot. Om 1800 henne bin die van Nanninge verplaetst. Iene kwam an de noordkaante en iene an de zuudkaante an de Nanningesluus of et Nanningeverlaot, dat d’r in 1815 kommen is. (Foto en tekst: Sietske Bloemhoff)
Intied bin drie buurtschoppen van Oosterwoolde zo goed as opslokt deur de ni’jbouw in et westelike pat. Iene daorvan is Nanninge; dat was indertied een kleine buurtschop bi’j de boerderi’je mit dezelde naeme (boverste foto). De boerderi’je is nog et ienige dat van de buurtschop overbleven is. In vroeger jaoren leup d’r een fietspad bi’j langes dat vanof Nanningesluus naor et dörp leup. Omreden de drie buurtschoppen zo dichte bi’j mekere liggen is indertied in Nanninge een bod plaetst mit alledrie de naemen. (Foto’s en tekst: Sietske Bloemhoff)