Stellingwarfs in et ‘wild’

In Stienwiekerwoold het et wooncentrum veur oolderen ok een mooie Stellingwarver naeme, en dat is: Woldleite. Henk Jager zag disse naeme tiedens zien fietstocht van oflopen weke, doe hi’j ok nr. 314 zag. Krek zoas dat in de Stellingwarven zels wel es gebeurt, ziej’ dat ok hier ‘wold’ bruukt wodt, wiels et ‘woold’ wezen moeten zol. Et woorddiel ‘leite’ is de Stellingwarver variaant veur luwte, dat neffens oonze spellingsregels as ‘li’jte’ schreven wodt.

Oflopen weke fietste Henk Jager deur de bebouwde koeme van Stienwiekerwoold en zag daor dit gebouw mit de naeme ’t Olde Wold. Et gebouw bestaot uut huurapattementen.

Dit bod ston in 2019 an de Helomaweg op et plak daor de paosbult kommen mos en laeter… et paosvuur van De Fochtel. A’k et me goed herinnere moch dat doe vanwege de dreugte niet deurgaon. (Foto en tekst: Johan Veenstra)

Om Oosterwoolde henne liggen een flink tal buurtschoppen. Dat is op himzels al hiel biezunder, mar biezunder is ok dat indertied de Historische Verieninge Oosterwoolde, in saemenwarking mit de Stellingwarver Schrieversronte, zorgd het veur prachtige infermaosiebodden. Op die bodden is de geschiedenis van de buurtschop te lezen, en hielemaole in et Stellingwarfs. Mit naeme de veurzitter van de HV Oosterwoolde van doe, Geert van der Meulen, die eerder ok bestuurslid was van de Stellingwarver Schrieversronte, het him daor ommeraek veur inzet. Op disse fotos zien jim de buurtschop, mit et bod, van Medhuzen an de Rijweg tussen Oosterwooolde en De Fochtel. (Foto’s en tekst: Sietske Bloemhoff)

Doe we vandezoemer deur Kaelenbarg fietsten, zaggen we een bottien mit de naeme An ’t Waeter d’r op. De femilie Schelhaas het in et dörpien Wetering, dat in de Kop van Overiessel in et Nationaol Park Weerribben-Wieden ligt, in een oolde boerderi’je een B&B en een resteraant plus terras an ’t waeter. Ie kun d’r ok kamperen. (Foto en tekst: Johan Veenstra)