Een auto mit et opschrift Stellingwarver Koffie zag ik tiedens mien fietstocht op 23 juli in de Braandemeer onder Ni’jlaemer. Op internet zag ik daj’ bi’j dit bedrief Stellingwarver koffie kriegen kunnen en dat ze koffiemesienen verkopen, et onderhoold doen en ze eventueel rippereren. (Tekst en foto: Johan Veenstra)
Tiedens mien fietstocht van vandaege (12 juli 2020) zag ik bi’j et witte Lendebroggien op ’e Hoeve drie mooi uutdoste manluden van de meziek-/zanggroep Klebienders uut Wolvege. Ze weren krek doende en hang kompleet Stellingwarfstaelige anplakbiljetten op. Ze zollen speulen en zingen tiedens de Hoepel Op CoronaWandeling die vandaege op ’e Hoeve orgeniseerd wodt. Doe ’k zee da’k d’r foto’s van maeken zol, gaf ien van de Klebienders me een peer kloppies op ’e schoolder. Ik hebbe vanzels zegd dat de man in disse tied niet an me zitten mag! Straks hiel Ni’jhooltpae in quarantaine vanwege de schoolderkloppies van die iene man van de Klebienders! (Tekst en foto’s: Johan Veenstra)
De Appelsche Hof is de naeme van een pankoekeresteraant an de Boerestreek in Appelsche. Johan Veenstra stuurde disse foto’s in veur Stellingwarfs in et ‘wild’.
Wolly Huinink van Wolvege stuurde weer een foto van een mooie Stellingwarver naeme in veur de rebriek Stellingwarfs in et ‘wild’. Ze zag de naeme van et jeugdhonk van Munnikeburen tiedens een fietstocht deur et mooie West-Stellingwarf, zo geft ze an.
Van Annie Dedden en Johan Veenstra kregen we veur de serie Stellingwarfs in’t ‘wild’ foto’s binnen mit de naeme ’t Olde Wief. Johan schrift daor et volgende over: ’t Olde Wief is de naeme van een B&B in Ooldetriene. Et heurt eins oolde te wezen in plak van olde. Aandere veurbeelden in disse serie mit olde daor et eins oolde wezen moet bin: de olde duker (32), ’t Olde café (33), ’t Olde Wold (77) en De Olde Tramhalte (225).
