Wolly Huinink van Wolvege stuurde weer een foto van een mooie Stellingwarver naeme in veur de rebriek Stellingwarfs in et ‘wild’. Ze zag de naeme van et jeugdhonk van Munnikeburen tiedens een fietstocht deur et mooie West-Stellingwarf, zo geft ze an.
Van Annie Dedden en Johan Veenstra kregen we veur de serie Stellingwarfs in’t ‘wild’ foto’s binnen mit de naeme ’t Olde Wief. Johan schrift daor et volgende over: ’t Olde Wief is de naeme van een B&B in Ooldetriene. Et heurt eins oolde te wezen in plak van olde. Aandere veurbeelden in disse serie mit olde daor et eins oolde wezen moet bin: de olde duker (32), ’t Olde café (33), ’t Olde Wold (77) en De Olde Tramhalte (225).
‘Doe ‘k op een keer over de Dwasvaortweg op ‘e Oosterstreek fietste, zag ik bi’j nommer 32 dit bod staon. Aenlik is de juuste spelling zo: Kiek mar es even. Mar toch: mooi dat zoks in et Stellingwarfs daon wodt!’ (Foto en tekst: Johan Veenstra)
An de Vaort Noordziede in Appelsche staot zo nowm en dan dit kraompien waoj’ veur een zaacht priesien varve kopen kunnen. Dat is mooi! Et zaachte priesien, en de Stellingwarver naeme ’t Kraompien. Jammer is vanzels dat d’r oa staot in plak van ao. Mar veur een kraompien mit varve moet dat makkelik op te lossen wezen, zoj’ zeggen! Akkie Zeilstra van Raevenswoold maekte de foto en stuurde die deur.
Gister wodde Chyl Maatman van ‘Handel & Diensten’ in Wolvege 30 jaor, en dat wodde wel dudelik aj’ langs zien bedrief kwammen! Et Stellingwarfs is him ok niet onbekend, want: ‘bij alle feesies an de praot’. Dat zal gister grif ok et geval west hebben. Annie Dedden van Wolvege stuurde de foto’s in.
