Stellingwarfs in et ‘wild’

• 

Op et eilaantien bi’j de sluus en de brogge over De Kuunder bi’j Ni’jberkoop staot dit taelmonement. De Kuunder wodt van ooldsher roegweg zien as de taelgreens tussen et Stellingwarfs en et Fries. Et monement wodde maekt deur Atte Jongstra en is in 1999 hier plaetst. De Stellingwarver tekst is:
‘Gaon. Moe‘n ienkeer. Overstikken dommiet. Telane kommen. Deurzicht‘; de Friese: ‘Komme. Tusken twa wrâlden telâne. Op in grins bliuwe wolle. Útsicht.’

• 

De Uutwiek, nog een mooie Stellingwarver naeme in Woonzorgcentrum LindeStede in Wolvege. Disse naeme kwammen we al es eerder tegen in Stellingwarfs in et ‘wild’; nr. 21 geft an dat et ok de naeme is van et haventien van Berkoop. Annie Dedden uut Wolvege stuurde de foto van de Wolvegester ‘Uutwiek’ in.

• 

• 

In Woonzorgcentrum LindeStede in Wolvege bruken ze veul Stellingwarver naemen veur verschillende ruumten, jim zaggen daor eerder al een peer veurbeelden van. Op ‘e foto van vandaege zien jim de Stellingwarver naeme de Meulen. Warschienlik wodt hier iene meule bedoeld, mar is d’r uutgaon van et Nederlaanse woord ‘molen’. ‘Meulen’ geft in et Stellingwarfs an dat et om meer as iene gaot… De foto is instuurd deur Annie Dedden.

Arie den Blancken van de Veneboeren uut Makkinge maekte disse foto van een kraene van de Warktugeverieninge De Samenwerking. Dat die uut Else komt, lat kraenmassienist Ko Brouwer graeg weten. ‘Et zol mooi wezen as meer verieninges of bedrieven et Stelllingwarfs bruken zollen,’ neffens Arie. En dat is de redaktie van StellingPlus vanzels hielemaole mit him iens!

Modeontwarper Hans Noordstrand en zien vrouw/vrundinne in Ni’jhooltpae hebben een zeune kregen en et joongien hiet van Pyter. Daoromme hebben ze de vlagge uut en staot d’r een bod bi’j de hekkedam! Iederiene mag et weten! Johan Veenstra maekte de foto en schreef de tekst veur al weer nr. 190 in de serie Stellingwarfs in et wild.