Stellingwarfs in et ‘wild’

Van Hendrik Betten kregen we een schoffien leden een riegel foto’s veur de rebriek Stellingwarfs in et ‘wild’. Jim zien d’r hier weer es iene van. En jim zien d’r mar liefst twie Stellingwarver naemen op! De eerste is die van et ‘Stellingwarver praothuus’, now, jim kun wel raoden wat de Elsigers daor doen… Et Elser praothuus is aenlik de kantine van de sportverienings, mar wodt ok deur ere verienings bruukt as d’r in kefé ’t Anker wat eers te doen is.

Een schoffien leden kregen we dit mooie veurbeeld van Stellingwarfs in ’t wild op een t-shirt. Otto de Vent van De Fochtel wol, zoas hi’j leut oons weten, ok niet aachterblieven mit een bi’jdrege veur de rebriek! Otto maekte de foto tiedens et dörpsfeest van De Fochtel op oflopen 30 september.

Johan Veenstra schreef bi’j disse foto veur Stellingwarfs in et ‘wild’  et volgende: Aj’ op ’e fiets onderweg binnen ziej’ nog es wat! Ik was mit een kollektebusse bi’j de weg en zag doe et bottien mit Opa’s Laand d’r op. Et is de naeme van een hoeke laand an de Binnenweg in Ni’jhooltpae dat bi’j De Bron heurt. Et oorspronkelike boerelaand is een grote viever in greven en d’r bin boompies plaant. Et aorige is dat dit vroeger et laand van een omke van mi’j was.

‘Mooi da’j west bin’n… gauw weer komm’n’ is te lezen op ‘e aachterkaante van et toegangsbod bi’j de ingang naor et eupenlochttheater De Koele van Appelsche. Et is mitien nommer 120 in de rebriek Stellingwarfs in ’t ‘wild’. Et is vanzels wel een betien jammer dat de spelling van et Stellingwarfs niet goed bruukt is… Dan zol d’r ommes staon hebben: ‘Mooi daj’ west binnen… gauw weer kommen’. Veur de foto’s zorgde Renzo Bruggink uut Raevenswoold.

De naeme De Koele kwammen we eerder ok al es tegen in disse rebriek (nr. 87). Et gong doe om De Koele bi’j Hooltpae. Mar De Koele is ok de naeme van et zo mooie eupenlochttheater van Appelsche! Veur de foto’s zorgde Renzo Bruggink van Raevenswoold.