Kleuters van De Riemsloot naor de Bargfeesten van Appelsche

door

in-de-kring

Luusteren naor de aeventuren van Piepmoes en zien buurman de molle (foto: Lenus v.d. Broek)

De leerlingen van de groepen 1 en 2 van OBS De Riemsloot van Appelsche stonnen d’r vri’jdag mar zommers op. Dat kwam omreden ze as ofsluting van een muzikaol en zommers taelprojekt die dag de Bargfeesten van Appelsche vierden.

piepmoes

Veul enthousiasme bi’j de leerlingen! (Foto: Lenus v.d. Broek)

wij-gaon-now-op-vekaansie

Mit mekeer zingen: ‘Wi’j gaon now op vekaansie mit Piepmoes en zien kammeraod’ (foto: Lenus v.d. Broek)

Et muzikaole taelprojekt wodde geven in et kader van arfgoededukaosie. Daans- en expressiedocente Lianne Jacobs uut Appelsche en Sietske Bloemhoff van de Stellingwarver Schrieversronte weren vier morgens in de weer mit dit deur heur speciaol ontwikkelde projekt. Et onderwarp van et projekt was et toerisme in Appelsche. Wat d’r in Appelsche allemaole te zien is was te heuren in lieties en verhaelties over Piepmoes. De Stellingwarver moes gaot mit zien buurman de molle op vekaansie naor Appelsche. De molle wil wel es zien as de dunen en bargen van Appelsche écht hoger binnen as zien mollebulte! En Piepmoes daenkt dat ze in Appelsche gien hinder hebben zullen van zien iewige vi’jaand Klaos Kaeter.

zwemmen-in-et-bosbad

Zwemmen in et Bosbad! (Foto: Lenus v.d. Broek)

An de haand van de lieties en verhaelties leerde Lianne Jacobs op een slim levendige en enthousiaste wieze de kiender alderhaande muzikaole expressievormen an. Bi’j een zowat drie kertier durende slotveurstelling van et projekt dee blieken mit hoeveul plezier de kiender alles in vier morgens in heur opneumen hadden. De veurstelling wodde een groot sukses, en et pebliek dat uut veul oolden, bruurties, zussies, paken en beppen beston, zong dan ok uut volle bost et slotlied ’Gaon jim mit naor Appelsche’ mit.

lianne

Luusteren naor Lianne (foto: Lenus v.d. Broek)

dsc_8553

Veul applaus en serpentines an et aende van de veurstelling (foto: Lenus v.d. Broek)

Et doel is dat et projekt ok an ere Stellingwarver basisschoelen anbeuden wodt. Et wodt dan inhooldelik anpast naor de omgevingssituaosie van die schoelen.

Harmen Houtman wint eerste pries van verhaelewedstried

door

harmen2-025

Op vri’jdag  28 oktober  kreeg Harmen Houtman tiedens een kulturele aovend de eerste pries uutrikt van een verhaelewedstried. Die wedstried wodde orgeniseerd deur STEM  (Stichting Taalpodium  Emmen). De uutrikkinge was in de Nacht van de Nacht in de Grote Karke in dat plak. Et  thema van de verhaelewedstried was et toepasselike  woord ’Donker/Duuster’.  D’r weren mit mekeer rond de veertig inzendings.

Veur de kattegorie Streektael  stuurde Houtman et verhael ’Een zaacht vellegien’ in.  Prissentaoter   Eric van Oosterhout, neerlandikus en borgemeister van de gemiente  Hunze en AA, hadde veurofgaonde an de uutrikkinge een vraoggesprek mit Harmen Houtman.  Die vertelde dat veural de Schrieversronte  een enorme anvieterende rolle het bi’j et schrieven en et behoold van de Stellingwarver  tael.

Nao et veurlezen  van et winnende verhael  kwammen  de volgende opmarkings  van de juryleden  Jan Veenstra (Drentse schriever), Ton Peters (redaktie Roet/ schriever/dichter) en Coosje Hoekstra (schriever en redaktrice): ‘Een geweldig verhael mit een verrassend aende. De tragiek van de ienzemheid is goed weergeven. Et geft  de stried tegen et noodlot goed weer.  D’r is spraoke van een lakonieke meniere van vertellen. D’r is zeker gien drama kreëerd.’

Et winnende verhael  staot mit vuuftien ere verhaelen in de bundel ’Duister’ die as op die aovend ok prissenteerd wodde. Tiedens de aovend weren d’r optredens van schriever  A.L. Snijder (winner van de Constantijn Huygenspries in 2010), Jan Veenstra en Ton Peters. Veur meziek zorgde et Swing String Quartet.

Kursus Stellingwarfs uut aende

door

kursus-st-nov-2016  kursrs-ste-nov-16

De kursus ‘Stellingwarfs veur beginners’ gong oflopen maendag uut aende in de Hoolten Klinte in Appelsche. Tiedens disse kursus is d’r veural ommedaenken veur et schrieven en praoten van die zo mooie oolde Nedersaksische tael. Dat pat wodt verzorgd deur dr. Henk Bloemhoff en Mark van Veen. Ien van de lesaovens is d’r liekewel ok andacht veur de geschiedenis van Stellingwarf. Dat onderdiel wodt verzorgd deur Geert Lantinga van Wolvege. Nao ofloop van de kursus verzorgt Lantinga butendat een exkursie in een Stellingwarfs netuurgebied. (Foto’s: Lenus v.d. Broek)

’Stellingwarfs bedrog’ beste Stellingwarver lied van 2016!

door

dsc_8012

De zanggroep ‘k Wait nait’ wun de eerste pries mit ‘Stellingwarfs bedrog’ (foto: Lenus v.d. Broek)

dsc_7990

De twiede pries was veur Serge Epskamp mit ‘Kri’jen op et veld’ (foto: Lenus v.d. Broek)

dsc_8040

De dadde pries gong naor Flashbang mit ‘Gisteraovend’ (foto: Lenus v.d. Broek)

Zaoterdagaovend 12 november wun de zanggroep ‘’k Wait nait’ et Stellingwarfs Meziekfestival 2016 mit et lied ’Stellingwarfs bedrog’. Serge Epskamp wun de twiede pries mit ’Kri’jen op et veld’ wiels de dadde pries naor de band Flashbang gong mit ’Gisteraovend’. Et Stellingwarfs Meziekfestival was dit keer in De Miente in Oosterwoolde. Roem over de honderd bezukers zorgden mit mekeer veur een sfeervolle muzikaole Stellingwarver aovend. Behalven de drie winners van de wedstried deden an et festival mit: Lammy Bruyns (zi’j wun veurig jaor de eerste pries), et duo The Lion Rules, et koor Elser Smart en De Scheve Schaats Band. Deur ziekte moest de band Spirit of the Dark verstek gaon laoten. De jury beston uut Gerda Hoogeveen, Philomène Bloemhoff en Appie van Riesen. De prissentaosie was, op heur bekende enthousiaste wieze, in hanen van Anna Span, veur et veurtreffelike geluud zorgde Kor Slofstra. Et festival wodde rechtstreeks uutzunnen deur de lekaole omroep Odrie. Et doel is dat de Stellingwarver Schrieversronte et festival ankem jaor opni’j orgeniseren zal in Oosterwoolde; de eerste dielnemers gavven heur al op.

dsc_7995

D’r was ommeraek veul belangstelling én wardering veur et festival (foto: Lenus v.d. Broek)

dsc_7934

Ok Lammy Bruyns, de winneres van veurig jaor, dee weer an et festival mit (foto: Lenus v.d. Broek)

dsc_7950

Veur een smaekvol optreden zorgde et duo The Lion Rules (foto: Lenus v.d. Broek)

dsc_7984

Veur een sprankelende prissentaosie zorgde Anna Span (‘Pippi van Odrie’) (foto: Lenus v.d. Broek)

dsc_7967

Veul lof was d’r ok veur et koor ‘Elser Smart’, mit oolde Stellingwarver ’tradionals’ as De Bakkiesman en Waor de Lende (foto: Lenus v.d. Broek)

dsc_8022

De Scheve Schaats Band brocht bekende covers mit Stellingwarver vertaelings die goed in de smaek vullen (foto: Lenus v.d. Broek) 

 

 

 

Anpaste begintied Stellingwarfs Meziekfestival

door

spirit-2015

Omreden zangeres Jannie Dijkstra de griep het, kan Spirit of the dark niet mitdoen an et Stellingwarfs Meziekfestival. Dat festival is op zaoterdag 12 november in De Miente in Oosterwoolde. De band uut Else zol as eerste optreden, zodat et festival niet om 18.00 ure begint, mar om 18.45 ure!