22. De Miente

door

De Miente, 1, Joke

De Miente, 2, Joke

An de Snellingerdiek in Oosterwoolde staot et aktiviteitencentrum mit de Stellingwarver naeme ‘De Miente’. In et centrum wo’n veul kulturele aktiviteiten orgeniseerd, en d’r is ok onderdak veur de lekaole omroep Odrie. Mit ‘miente’ wodt gemienschoppelik laand bedield; laand dat deur meerdere boeren bruukt wodde. Ok as streeknaeme komt et veur, zoas de buurtschop bi’j Noordwoolde. ‘De Miente’ in Oosterwoolde geft an dat et centrum bedoeld is veur gemienschoppelik gebruuk. De foto’s wodden maekt en opstuurd deur Joke Brouwer uut Oosterwoolde.

21. De Uutwiek

door

De uutwiek, Liest

Ok al zoj’ d’r niet mitien an daenken, mar et dörp Berkoop het een haventien. Dat ligt an et aende van de Preenzewiek, die veur een veerverbiening zorgd vanof de revier De Kuunder. De haven het plak veur zoe’n twintig boten en het de mooie Stellingwarver naeme De Uutwiek. De foto wodde maekt en toestuurd deur Hans Liest van Berkoop.

20. De Haegen

door

De Haegen, Johan 2

De Haegen, Johan 1

In Ni’jhooltwoolde staot an de Weerdiek dit huus mit de Stellingwarver naeme ‘De Haegen’. De betekenis van et woord haege is een stroke laand tussen twie kraggen. Bi’j et turfstikken wodde de grond op ’e haegen gooid, zo bin ze ontstaon. De foto’s mit de gegevens kommen van Johan Veenstra van Ni’jhooltpae.

19. Bedde en broggien

door

Bedde en broggien, Johan

Bedde en broggien. Dat is et Stellingwarfs veur ‘bed and breakfast’! Daorveur kuj’ terechte bi’j Fokje Siegersma middenin Ni’jhooltpae tegenover de oolde schoele. Ie kun d’r ommeraek goed slaopen en kriegen d’r lieke lekkere broggies! De foto mit de gegevens wodde oons veur de rebriek ‘Stellingwarfs in et wild’ toestuurd deur Johan Veenstra.

23 oktober: streekhistorie en volksverhaelen

door

Op vri’jdagaovend 23 oktober orgeniseren Stichting Kunstwerf en de Stellingwarver Schrieversronte gezaemelik een biezundere streekkulturele aovend. Veur et schoft vertelt streekkenner Geert Lantinga van Wolvege an de haand van een schitterende PowerPoint over de vroege geschiedenis van Stellingwarf tot an ongeveer 1200 toe, doe de eerste Stellingwarver dörpen ontstaon binnen. In flink wat oorkonden van die tied of bin de naemen d’r van veur et eerst te lezen en is daoromme et bestaon van die dörpen zeker. Mar wanneer haj’ hier de eerste bewoners, waor kwammen ze weg en hoe zag et laandschop d’r hier veur et jaor 1000 aenlik uut? Over al die onderwarpen vertelt Geert Lantinga op indrokwekkende wieze.

Volksverhaelen

Nao et schoft zal Klaasje Herder van Oosterwoolde oolde volksverhaelen uut Stellingwarf vertellen. Ze maekte daorveur een keuze uut de prachtige verhaelen van volksverhaeleverteller Wube Lamers van de Kuunderwal (1912-2001), zoas hi’j ze indertied deur overlevering kende en deurgaf.

Herkomst en betekenis

Nao et vertellen van de verhaelen zal taelkundige dr. Henk Bloemhoff ingaon op de aachtergrond en betekenis van de (Stellingwarver) volksverhaelen. Waor kommen ze weg, wodden ze mit een bepaolde reden verteld, wat zol de betekenis wezen kunnen en kwammen ze ok op ere plakken veur zoas in ere Nedersaksische gebieden.

Veur iederiene die interesseerd is in zien eigen leefomgeving is disse aovend een ‘must’ om naor toe te gaon! 

Daotum en tied: vri’jdagaovend 23 oktober, vanof 20.00 ure

Plak: Hotel-Resteraant De Zon in Oosterwoolde

Intree: € 5,00

Risserveren: Stellingwarver Schrieversronte (0516-451108, info@stellingwarfs.nl) of Stichting Kunstwerf (info@kunstwerf.com)