In saemenwarking mit de perveensie Frieslaand en Boeken fan Fryslân is op donderdag 29 jannewaori et boekeprojekt ‘Bus vol verhaelen’ uut aende gaon. In vuuftien bussen van Arriva en Qbuzz bin kaasten mit Friese en Stellingwarver boeken kommen te staon. Reizigers kun zo tiedens heur reize een boek lezen. Van vier Stellingwarver schrievers bin boeken deur de Stellingwarver Schrieversronte beschikber steld veur dit unieke projekt. Et gaot om boeken mit kotte verhaelen en gedichten van Roely Bakker, Harmen Houtman, Sjoukje Oosterloo en Johan Veenstra.

Henk J. Jager is de auteur van et ni’jste Stellingwarver netuurboek ‘Vissen, amfibienen en reptielen in Stellingwarf’. (Foto: Klaas van der Veen)

Bi’j de Stellingwarver Schrieversronte in Berkoop bin ze d’r mar wat wies mit dat opni’j een diel in de serie netuurboeken uutgeven wodden kon. Naodat eerder Et Stellingwarver plaanteboek en Et Stellingwarver voegelboek uutgeven wodden, wodt op zaoterdag 7 feberwaori et dadde diel prissenteerd. In dat ni’jste boek beschrift Henk Jager van Berkoop de vissen, amfibienen en reptielen die in Stellingwarf veurkommen, of veurkommen kunnen. Jager beschrift liekewel ok de belangriekste netuurterreinen waor de diersoorten leven, en zorgt butendat veur veul infermaosie over bi’jglieks et vissen in vroeger tieden. Et boek is ok om die reden een weerdevolle anweenst veur de uutgeveri’je van de Schrieversronte. Butengewoon mooi bin de talrieke foto’s, die in et boek opneumen binnen, daorveur zorgde fotograaf Klaas van der Veen uut Meppel. De eerste beide exemplaoren van et boek zullen uutrikt wodden an wethoolder Sierd de Boer van Oost-Stellingwarf en wethoolder Frans Kloosterman van West-Stellingwarf. Et boek dat 120 bladzieden telt, wodde drokt bi’j Printbase b.v. uut Suntjehannesge. Nao 7 feberwaori is et boek (€ 17,50) te koop bi’j o.e. Bruna Oosterwoolde, The Readshop in Wolvege en bi’j de Schrieversronte in Berkoop.

Henk Jager is ok de auteur van ‘Et Stellingwarver plaanteboek’.

Bi’j de NAM hebben ze de aorige gewoonte om mit riegelmaot geld te schinken an instellings waor heur passeniel as vri’jwilliger aktief veur is. De NAM-mitwarker mag zels een verzuuk veur een donaosie indienen. Kotleden gebeurde dat deur Akkie Zijlstra, aktief lid van de warkgroep Publiciteit van de Stellingwarver Schrieversronte. De NAM oordielde positief over Akkie heur anvraoge en besleut om €300,00 beschikber te stellen veur de veerdere ontwikkeling en digitalisering van et Kenniscentrum van de Stellingwarver Schrieversronte.

Een peer jaor leden kon de stichting deur een donaosie van de NAM een speciaole Stellingwarver vlagge ontwarpen en maeken laoten. Ok die anvraoge daorveur wodde indiend deur Akkie Zijlstra.

De jury van de jaorlikse Dagblad van het Noorden-streektaelpries het zien kotte liesten opsteld van perdukties in de streektael uut 2014. In de kattegerie boeken staon d’r zesse op nommenaosie. Et goeie ni’js is dat et keunst- en poëzieboek ‘Van schossel tot slingerpad’, een uutgifte van de Stellingwarver Schrieversronte, iene van die zesse is [bron: DvhN 17-1-2015].

Ok veurig jaor wodde een uutgifte van de Schrieversronte nommeneerd, doe gong et om et winterboek veur kiender ‘Winterwille’. Et bestuur en passeniel van de stichting bin vanzels ommeraek wie mit disse ni’je nommenaosie.

Twiede kaemerlid Lutz Jacobi (PvdA) nam oflopen zommer et eerste exemplaor van ‘Van schossel tot slingerpad’ in ontvangst. (Foto: Sietske Bloemhoff)

Hej’ trouwens zels belangstelling veur ‘Van schossel tot slingerpad’? In dit prachtige boek bin ofbelings van wark te zien van drie belende keunsteners uut Stellingwarf (Peter Hiemstra, Christiaan Kuitwaard en Marjolein Spitteler), en bin gedichten te lezen van drie Stellingwarver dichters (Roely Bakker, Christine Mulder en Willem Jan Teijema). Alle zesse hebben heur bi’j heur wark inspireren laoten deur et thema ‘ruumte’. Et boek is uutgeven in een had kaft, telt 56 blz. en gelt € 17,50. Et is Schrieversronte-uutgifte 160; ISBN 987-90-6466-173-0.