Ni’js – Pagina 216 – StellingPlus.nl

‘Van schossel tot slingerpad’ op nommenaosie

18 januari 2015 door Redaktie

De jury van de jaorlikse Dagblad van het Noorden-streektaelpries het zien kotte liesten opsteld van perdukties in de streektael uut 2014. In de kattegerie boeken staon d’r zesse op nommenaosie. Et goeie ni’js is dat et keunst- en poëzieboek ‘Van schossel tot slingerpad’, een uutgifte van de Stellingwarver Schrieversronte, iene van die zesse is [bron: DvhN 17-1-2015].

Ok veurig jaor wodde een uutgifte van de Schrieversronte nommeneerd, doe gong et om et winterboek veur kiender ‘Winterwille’. Et bestuur en passeniel van de stichting bin vanzels ommeraek wie mit disse ni’je nommenaosie.

Twiede kaemerlid Lutz Jacobi (PvdA) nam oflopen zommer et eerste exemplaor van ‘Van schossel tot slingerpad’ in ontvangst. (Foto: Sietske Bloemhoff)

Hej’ trouwens zels belangstelling veur ‘Van schossel tot slingerpad’? In dit prachtige boek bin ofbelings van wark te zien van drie belende keunsteners uut Stellingwarf (Peter Hiemstra, Christiaan Kuitwaard en Marjolein Spitteler), en bin gedichten te lezen van drie Stellingwarver dichters (Roely Bakker, Christine Mulder en Willem Jan Teijema). Alle zesse hebben heur bi’j heur wark inspireren laoten deur et thema ‘ruumte’. Et boek is uutgeven in een had kaft, telt 56 blz. en gelt € 17,50. Et is Schrieversronte-uutgifte 160; ISBN 987-90-6466-173-0.

Drie daegen Stellingwarver veurleesaktie

16 januari 201516 januari 2015 door Redaktie

Mar liefst drie daegen weren zoe’n twintig veurleesvri’jwilligers op pad veur de jaorlikse veurleesaktie in de Stellingwarver zorginstellings. De aktie die deur de Stellingwarver Schrieversronte orgeniseerd wodt, is al jaor in jaor uut een sukses. In alle zorginstellings in de beide gemienten, mar ok in de Menning in Wilhelminaoord wodt deur de veurlezers uut een speciaole veurleesmappe veurlezen, die jaorliks anvuld wodt mit ni’je verhaelen en gedichten. Hiel vaeke wodt an de veurlezers vraogd as ze niet wat vaeker kommen kunnen, en pattie veurlezers voldoen graeg an die vraoge.

Op ’e foto’s zien jim vier veurlezers drok in de weer. Dat bin Mettje van Riezen in Rikkingehof (Oosterwoolde), Thijs Hofstee in Sickengaoord (Wolvege), Kiena Bouwer in Sinnehiem (Haulerwiek) en Femmie van Veen in Wilgenstede (Wolvege). Veur de mooie foto’s zorgde Lenus van der Broek.

Kiena, 2015

Mooi ooldejaorskedo van Geitefok

16 januari 201516 januari 2015 door Redaktie

De ooldejaorsploeg van Berkoop zorgde ok bi’j de laeste jaorwisseling weer veur mooie kedo’s veur tal van verienings in et dörp. Ok de Stellingwarver Schrieversronte wodde bliede maekt; dit keer mit een prachtige rejaole koffiekanne. Die komt arg goed van passe, want een peer kleineren weren al een posien echt an vervanging toe. Op et kantoor van de Schrieversronte bin ze dan ok ommeraek wies mit et mooie kedo van de Geitefok!

Moezeplaog: ni’j verhael van Sjoukje Oosterloo

25 februari 202016 januari 2015 door Redaktie

Moezeplaog

Vergeten doe ik et nooit meer, die keer dat mien mem op zoolder in de lappedeuze an et zuken was naor een geschikt lappien om argens wat mit te verstokken. Netuurlik zat ik daor as kiend mit de neuze kot bovenop, doe daor inienen een moes uut springen kwam. Et besien wodde stoort in zien waarme nussien tussen de lappies. Et het jaoren duurd eer mien moezeangst verdwenen was, mar vandaege de dag is et wel over. Veural now we in oonze perveensie konfronteerd wo’n mit een moezeplaog is mien angst veur die kleine opvreterties wel over. Et is toch alderneerst aj’ die beelden zien op tillevisie, hoe as alle gröswottels deurvreten wodden en et grune laand veraandert in een brune doodse vlakte mit allemaole gatten d’r in. De boeren hebben d’r een dikke strop an en jim hoeven d’r dan ok niet mal van op te kieken dat d’r mennig bedrief om ziepe gaot. Vergoeding kriegen de bedrieven niet omreden dit onder et bedriefsrisiko valen zol. Laot me niet lachen! Dit is echt gien bedriefsrisiko meer! Geld om vot te geven an ere lanen omreden zi’j geldpiene hebben is d’r wel, mar oonze boeren laoten ze gewoonweg versoepen. Oons mooie grune gröslaand gaot hielendal naor de barrebiesies as d’r niks an daon wodt om dit knaegende moezevolk te bestrieden. Onder waeter zetten is gien optie, en mit gif bestrieden mag niet! Niks wodt d’r daon om disse plaoge te bestrieden. Doukies greven ze ok nog deur oonze zeedieken henne en jim kun wel raoden wat as d’r dan gebeurt, dan holen wi’j gien dreuge voeten meer!

Aj’ nog even veerder daenken dan weej’ dat d’r toekem jaor gien grös meer gruuit, de boeren dus gien voer meer hebben veur heur vee en de koenen dus ok gien melk meer geven. Dan is d’r gien melk, yochurt, botter en keze en zoks zo wat meer te kriegen. Dan zuj’ oonze hoge heren piepen heuren, dan piepen ze nog vule hadder as die miezerige moezen now doen. Een oplossing veur dit perbleem zol wezen as et es hiel hadde vriezen gong, mar dat liekt d’r nog in de veerste veerte niet op.

Toch moet d’r rap wat an daon wodden: laot oonze grondtroepen, de katten, d’r mar op los. Alle katten uut de asiels moeten mar loslaoten wodden op et laand waor die plaoggeesten huusholen. Zi’j die oonze boeren now in de stront zakken laoten, meugen dommiet helpen om de katten weer te vangen as ze heur wark daon hebben, en de moezeplaog verleden tied is.

Sjoukje Oosterloo

De Stellingwarver Veurleespries veur jong en oold

16 januari 201510 januari 2015 door Redaktie

De Stellingwarver Veurleespries is een ni’je veurleeswedstried van Stellingwarver gedichten, liedteksten, vassies of kotte poëtische teksten veur jeugd en volwassenen. Disse pries is een gemientelike Stellingwarver pries van Oost- en West-Stellingwarf tegere. De gemienten willen d’r op disse wieze graeg an mitwarken dat et Stellingwarfs in ere holen wodt; de orgenisaosie is in hanen van de Stellingwarver biebeltheken.

Wie an disse biezundere veurleeswedstried mitdoen wil kan veur de veurweerden daorveur kieken op de webstee www.bzof.nl. Op de nationaole gedichtedag op 29 jannewaori 2015 lezen alle nommeneerden in de biebeltheek van Wolvege veur, aovens van half achte tot negen ure. Et wodt vanzels een groot feest, waorbi’j een deskundige jury de winners anwiezen zal!

In 2013 wun Sjoukje Oosterloo uut Drachten, mar ofkomstig van Oosterwoolde, de Stellingwarver Schrieveri’jepries. De orgenisaosie van die gemientelike pries gebeurde tot en mit die keer deur een speciaol daorveur instelde warkgroep, en is daornao uutbesteded an de Stellingwarver biebeltheken. (Foto: Lenus van der Broek)