Jong van hatte mit et Stellingwarfs de toekomst in
Midden in Ni’jhooltpae, op ’e Hoeke, staot et beeld Takkemaeker. Et is van hadstien en maekt deur beeldhouwer Hans van Coevorden (Hardenberg, 1946). Van Coevorden woonde indertied in Ni’jhooltpae. Takkemaekers weren vroeger meerst losse arbeiders, die in de bossen en boswallen van takken takkebossen maekten. Zo konnen ze mit een eupen winter bi’j de hooltbaos een daghure verdienen. Foto’s en tekst veur Stellingwarfs in et ‘wild’ wodden instuurd deur Johan Veenstra.
Et komt riegelmaotig veur dat in disse serie dezelde Stellingwarver naemen in verschillende dörpen veurkommen. Nommer 98 was kefé De Polle in Blesdieke. Mar in Wolvege is een straotnaeme De Polle. Die straote is te vienen in de woonwiek Meulepolle, op et west van Wolvege. Johan Veenstra stuurde disse foto in veur de rebriek Stellingwarfs in et ‘wild’.
Netuurman en schriever Freddie de Vries (foto: Lenus v.d. Broek)
Vanwegens de Stellingwarver sutelaktie en de Friese boekemaond orgeniseren de Fryske Krite (Oosterwoolde), en de Stellingwarver Schrieversronte opni’j een gezaemelike literaire aovend. Die aovend is op vri’jdag 16 september in et aktiviteitencentrum De Miente in Oosterwoolde. Freddie de Vries, netuurman en schriever, zal op zien eigen humoristische wieze verhaelen veurlezen uut eigen wark. Datzelde geldt ok veur de Friese inbreng van netuurman en verteller Gjalt de Groot.
Et is alweer de vierde keer dat in dit saemenwarkingsverbaand een Stellingwarfs/Friese literaire aovend orgeniseerd wodt. Et pergramme van 16 september begint om 20.00 ure, de toegangspries is veur leden van de Krite en de Schrieversronte € 6,00, eren betaelen € 7,50.
De eerste exemplaoren weren veur Femke Prakken, wethoolder Sierd de Boer (rechts) en wethoolder Frans Kloosterman. Foto: Lenus v.d. Broek
De leerlingen van de Meester K.J. Dijkstraschoele geneuten ommeraek van de middag én van et ni’je boek. Foto: Lenus v.d. Broek
‘De wolf en de zeuven geities’ is iene van de sprokies die in et ni’je boek ’Sprokies van Grimm in ’t Stellingwarfs’ staon. In et sprokien verstopt et kleinste geitien him in een klokke as de wolf van plan is om alle geities uut et geitegezin op te eten. De wolf vint dat laeste geitien niet, en uuteindelik wo’n daordeur alle ere geities redded. Femmie van Veen las tiedens de prissentaosie van et boek et sprokien veur an de leerlingen van groep 5 en 6 van de Meester K.J. Dijkstraschoele van Else en die geneuten daor mit volle teugen van.
De eerste exemplaoren van et boek wodden deur SSR-veurzitter Jan Baas uutrikt al leerlinge Femke Prakken en an de beide Stellingwarver kultuurwethoolders, de heren Sierd de Boer van Oost-Stellingwarf en Frans Kloosterman van Stellingwarf-Westaende.
Beide wethoolders weren, krek as Femke, slim inneumen mit et ni’je boek. Wethoolder De Boer gaf butendat nog es naodrokkelik an hoe belangriek hi’j et vint dat et Stellingwarfs van generaosie op generaosie deurgeven wodt: ‘Zodat jim kiender laeter et ok weer deurgeven kunnen an heur kiender as jim pake en beppe binnen.’
Tiedens de middag vertelden initiatiefnemer veur et boek Anne Popkema van Taelburo Popkema en de beide illestraters Hilda Groenesteyn en Peter Boersma over heur wark an en veur et boek. Henk Bloemhoff vertelde as vertaeler, mar ok as taelkundige, daormao over de biezunderheden van de sprokies. Dat gong allemaole middels een vraoggesprek dat SSR-direkteur Sietske Bloemhoff mit heur hadde. De leerlingen konnen intied vraogen stellen en maekten daor ommeraek gebruuk van.
’Sprokies van Grimm in ’t Stellingwarfs’ wodde uutgeven deur Taelburo Popkema uut Grunningen i.s.m. de Stellingwarver Schrieversronte. Veur de vertaeling van de sprokies zorgden Sietske Bloemhoff en Henk Bloemhoff. Et boek is te koop in de boekhaandel, bi’j de SSR en tiedens de sutelaktie.
Twiede Kaemerlid Lutz Jacobi en oold-veurzitter SSR Ype Dijkstra deden goeie zaeken op ’e Haule
Mit prachtig zommers weer gong maendagmiddag op ’e Haule en in Donkerbroek de jaorlikse sutelaktie van de Stellingwarver Schrieversronte uut aende. Zoe’n twintig vri’jwilligers tuugden nao de eupening in Berkoop de diek uut mit o.e. de Stellingwarver Spreukekelender van 2017, twie ni’je routegidsen (deur et stroomgebied van De Lende) en et splinterni’je boek ’Sprokies van Grimm in ’t Stellingwarfs’.
Veurzitter Jan Baas gaf in zien welkomstwoord an weer op een slim goeie verkoop te hopen, mar ston eerst even stille bi’j et zo haostig uut de tied raeken van Geert van der Meulen. Oold-bestuurslid Van der Meulen hulp eerder jaorenlaank mit an de orgenisaosie van de aktie, en sutelde butendat elk jaor in zien woonplak Oosterwoolde.
Henk Veen (82) eupende de 42e sutelaktie
Tredisiegetrouw wodde de sutelaktie eupend deur et geven van een galp op de speciaole suteltoeter. Dit keer was die ere veur Henk Veen van Oosterwoolde, die mit zien 82 jaor iene van de ooldste sutelders is.
De sutelders bin ok woensdag 31 augustus en maendag 5 september in Stellingwarf-Oostaende. Ze kommen dan o.e. in Appelsche, De Fochtel, Else en Oosterwoolde. Vanof woensdag 7 september is de aktie in Westaende.
Koosje Hornstra, Sientje Hogeling en Ineke Oudshoorn zorgden veur lekkere broties veur de sutelders.
Foto’s: Lenus v.d. Broek