Pietermannen in De Kuunder

femmie-2-12-2015  klaas-31215-4

Femmie van Veen en Klaas Dijkstra vertellen over Pietermannen in De Kuunder en over hoe De Lende warkelik ontstaon is (foto’s: Sietske Bloemhoff)

Jim kun et geleuven of niet, mar in twielochten kon et bi’j de revier De Kuunder ommeraek geveerlik wezen. Niet op alle plakken, mar veural bi’j oolde kolken. Bi’j Berkoop is nog zoe’n stee, waor aj’ verhipte goed uutkieken moesten. Daor zatten in vroeger tieden Pietermannen in et waeter. Aj’ d’r dichte bi’j in de buurt kwammen, kon et zomar gebeuren dat die je bi’j de bienen grepen en je et waeter in trokken… Hoe dat allemaole percies zat, en as et d’r vandaege-de-dag ok nog zo geveerlik is,  kuj’ geweerwodden aj’ mitdoen an de fietstocht mit verhaelen, now kommende zundag 25 september. Femmie van Veen zal et je, bi’j de sluus tussen de Meulereed en de Tjongervallei, percies uutstokken! Ok op drie ere plakken staon verhaelevertellers klaor, zoas Johan Veenstra (Cranberryfarm, De Hoeve), Klaas Dijkstra (begin De Lende, Tronde) en Frank Spijkers (Karkeweg, Buil).

De fietstocht kan tussen 10.00 en 12.00 ure begonnen wodden bi’j et kantoor van de Stellingwarver Schrieversronte in Berkoop (Willinge Prinsstraote 10), mar ok bi’j kefé-resteraant Boszicht in Ni’jberkoop (Bovenweg 26). De tocht is 52 kilemeter, mar kan onderwegens makkelik inkot wodden. An et aende is d’r veur ieder een aorighied as andaenken. De kosten bin € 5,00 per persoon en kun an et begin van de tocht betaeld wodden.

Pompoenen en boeken

pompoenemark-16

Jim gaon toch vandaege of morgen ok even naor de gezellige pompoenedaegen bi’j de kezeboerderi’je van Van der Gun in Berkoop? Ok de SSR staot daor mit een mooie kraom vol Stellingwarver negosie. Vandaege wodt die bemand deur Akkie Zijlstra (rechts op ‘e foto) en Albertha Zwaagstra van de warkgroep Publiciteit. Morgen zorgen Ypie v.d. Boer en Johan Veenstra veur de kraom. De foto wodde maekt deur Albertha Zwaagstra.

Mooie aovend mit Stellingwarver en Friese verhaelen

freddie-en-gjalt-16-9-16

De Stellingwarver en Friese verhaelen van Freddie de Vries (links) en Gjalt de Groot vullen oflopen vri’jdagaovend 16 september ommeraek in de smaek. Op de gezaemelike literaire aovend van de Fryske Krite van Oosterwoolde en de Stellingwarver Schrieversronte kwammen goed vuuftig personen of. De Groot vertelde veural verhaelen uut zien jonge jaoren die hi’j deurbrocht in de omgeving van Wergea. Nao et schoft vertelde hi’j o.e. op humorische wieze over et vieren van Sunderklaos eerder, mar ok hoe hi’j now as pake zien kleinkiender veur et lappien hoolt…

Freddie de Vries las een zestal verhaelen veur uut eigen wark. Ok die warkten goed op ‘e lachspieren van de bezukers, zoas et verhael  hoe via et pergramme Spoorloos een onbekende zeune veur et locht komt. Ok et verhael waoromme een Stellingwarver skiër besluut om mit zien breuken bienen en ribben naor et ziekenhuus van Meppel te gaon en niet naor dat van Et Vene, is slim vermaekelik.

In 2017 wodt opni’j een literaire aovend orgeniseerd, dan mit een extra feestelik jubileumtintien, omreden et dan de vuufde keer wezen zal disse suksesvolle aovend gezaemelik orgeniseerd wodt.

Tiedens de aovend, die in De Miente in Oosterwoolde was, dee boekhaandel Bruna goeie zaeken mit de verkoop van Stellingwarver en Friese boeken.

 

Trijnie van de Schrieversronte mit pensioen

img_7700  img_7702

Links: Trijnie krigt o.e. een mooie bos bloemen van SSR-veurzitter Jan Baas

Rechts: Kollega Immy geft een ofscheidskedo uut naeme van alle kollega’s en kollega-vri’jwilligers

Naodat ze roem dattig jaor bi’j de Stellingwarver Schrieversronte warkt het, gaot Trijnie Telkamp (64) mit ingang van november mit pensioen. Donderdag 15 september was et heur laeste warkdag en was d’r om die reden een feestelik ofscheid veur Trijnie orgeniseerd. Veurzitter Jan Baas zorgde veur een biezundere toespraoke hielemaole op riem, dat slim wardeerd wodde deur iederiene. Daornao hadde direkteur Sietske Bloemhoff veul goeie woorden veur Trijnie, die al die jaoren slim plichtsgetrouw heur wark dee en heur slim inzet het veur mit naeme de opmaek van et tiedschrift De Ovend. Anslutend overhaandigde kollega Immy Sloot een kedo uut naeme van alle kollega’s, vaaste kollega-vri’jwilligers en oold-kollega Henk Bloemhoff. Nao de gezellige bi’jienkomst gong de laestnuumde groep nog mit mekeer uut eten bi’j ’t Hof in Berkoop. Dat etentien en een kevot mit inhoold wodde Trijnie Telkamp anbeuden deur de Stellingwarver Schrieversronte.

img_7707

Mit mekere uut eten mit kollega’s en kollega-vri’jwilligers, v.l.n.r: Jan de Vries, Saskia Douma, Kiena Bouwer, Trijnie Telkamp, Rosa Bosma, Immy Sloot, Sietske Bloemhoff en Ankie Verbaan. Op ‘e foto ontbrekt oold-kollega en vri’jwilliger Henk Bloemhoff, die vanwegens ere verplichtings d’r niet bi’j wezen kon.

 

 

111. Et is ok altied wat

tuun-noordwoolde

Tiedens de sutelaktie zag Annie Dedden disse stien mit een Stellingwarver tekst in een mooie tuun in Noordwoolde. Now schrieven we in et Stellingwarfs altied ‘et’ in plak van ‘het’, mar is zoe’n tekst op een dikke balstien now niet een aorig idee? Nommer 111 al weer in de serie stellingwarfs in et ‘wild‘!