De redaktie weenskt alle mitwarkers, inzenders foto’s rebriek ‘Stellingwarfs in ’t wild’ en bezukers van StellingPlus veul heil en zegen in et ni’je jaor!
Redaktie
122. Ik bin en blief een Boer
Een schoffien leden kregen we dit mooie veurbeeld van Stellingwarfs in ’t wild op een t-shirt. Otto de Vent van De Fochtel wol, zoas hi’j leut oons weten, ok niet aachterblieven mit een bi’jdrege veur de rebriek! Otto maekte de foto tiedens et dörpsfeest van De Fochtel op oflopen 30 september.
SSR-onderwiesprojekten ‘Daor klept de klokke weer’ en ‘De Veerkieker’ beloond
De onderwiesprojekten ’De Veerkieker’ en de film ’Daor klept de klokke weer’ van de Stellingwarver Schrieversronte kun beide uut aende gaon! Dat wodde zaoterdagmiddag dudelik nao ofloop van de speciaole prissentaosie- en stemmiddag van indiende projekten bi’j et Fonds Ooststellingwerf. Schrieversrontedirekteur Sietske Bloemhoff zee an et aende van de middag ommeraek bliede te wezen mit disse toezegging. ‘Zonder disse extra financiële middels hadden de projekten niet uut aende gaon kund. Veur de film ’Daor klept de klokke weer’ hadden we nog € 6.000,- neudig, eerder hadden de perveensie en Stichting Bercoop Fonds al € 12.500,- en € 4.000,- toezegd. Disse low-bugdetfilm kost mit mekeer € 24.500,-; dat d’r niet meer geld veur neudig is komt omreden d’r veul inzet wezen zal van vri’jwilligers uut de dörpen en SSR-vri’jwilligers. De film, die baseerd is op et gelieknaemige boek van H. Hoogeveen, vertelt over een biezundere periode in de geschiedenis van Stellingwarf. Dat weren de jaoren rond 1500 doe Stellingwarf veurgoed zien vri’jhied kwietraekte en bi’j Frieslaand indield wodde.’
Ok butengewoon mooi nuumt Bloemhoff et projekt ’De Veerkieker’: ‘Dit is een hiel ni’j projekt, dat veur alle basisschoelen ontwikkeld wodden zal. Et doel van ’De Veerkieker is dat alle groepen van et basionderwies ieder jaor op exkursie gaon naor een kulturele of arfgoedinstelling in Stellingwarf. Nao de basisschoele hebben de leerlingen dan weet van wat veur moois d’r an kultuur en arfgoed is in et gebied daor ze wonen. Et projekt, aenlik een leerlijn arfgoed, wodt ontwikkeld deur Marjolein Spitteler, Willy Bergsma en Wikje Haan. Van die drie vrouwluden komt ok et idee; eerder weren ze de coaches van et projekt Kiekes, dat onder et perveensiaole KEK-projekt vul. Et is fantastisch dat ze now tegere dit projekt hanen en voeten geven kunnen, want ze bin op dit gebied echt in et zoolt bebeten.’ Et tetaole bedrag veur de ontwikkeling van ’De Veerkieker’ is € 26.900,-, en ok die anvraoge is volledig honoreerd.
Ok et bestuur van de Stellingwarver Schrieversronte is slim inneumen mit beide toekennings. ‘De gemiente Oost-Stellingwarf én netuurlik al die meensken die zaoterdag op beide projekten stemden, geven an hoe belangriek ze omgevingsonderwies veur de jongste Stellingwarvers vienen. Dat wodt deur et bestuur geweldig wardeerd!’
Foto’s: Lenus v.d. Broek
Expesisie schilderi’jen en foto’s van De Lende
Annie Ligthart (Foto: Andries van Huizen)
Tot en mit donderdag 30 meert kan tiedens kantooruren van de Stellingwarver Schrieversronte een biezundere expesisie bezocht wodden. Naor anleiding van et verschienen van et dadde diel van de driedielige serie routegidsen ’Fietsen door het stroomgebied van De Lende’ wodde vlak veur de prissentaosie daorvan een kleine expesisie inricht. In de grote zael van et SSR-gebouw in Berkoop bin schilderi’jen en foto’s te zien die allemaole te maeken hebben mit (et stroomgebied) de revier De Lende. De schilderi’jen die te zien binnen, bin van Jeltje Baas van De Oosterstreek en van Annie Ligthart uut Oosterwoolde. Daornaost zorgde Geert Lantinga, de auteur van de Lenderoutegidsen. veur een tal minder bekende historische foto’s van de Stellingwarver revier. De expesisie is van maendag tot en mit donderdag te bekieken tussen 9.00 en 16.00 ure bi’j de Schrieversronte in Berkoop. De toegang is vergees.
Fietsen deur et stroomgebied van De Lende: serie van drie Lenderoutegidsen now kompleet
Woensdag was et een feestelike aovend bi’j de Stellingwarver Schrieversronte in Berkoop. Nao et welkom hieten deur bestuurslid Hendrik Fokkema wodde daor et eerste exemplaor van et dadde diel van de routegids ’Fietsen door het stroomgebied van De Lende’ uutrikt an kultuurwethoolder Sierd de Boer van Oost-Stellingwarf. D’r lag ok een eerste exemplaor klaor veur zien kollega van Stellingwarf-Westaende, mar spietig genoeg mos wethoolder Frans Kloosterman vanwegens griep verstek gaon laoten. De serie gidsen wodde schreven deur Geert Lantinga van Wolvege.
De heer De Boer leut in zien reaktie weten slim inneumen te wezen mit de gidsen. Niet alliend veur toeristen, mar ok veur de bewoners uut de eigen streek bin ze hiel weerdevol. Et dot nog al es blieken dat meensken heur eigen woongebied niet goed kennen en soms amper in de gaten hebben in wat veur mooi gebied ze leven. Ok de wethoolder hadde dat wel es erveren, zo zee hi’j, en hi’j wol daoromme zien vekaansies es wat vaeker in de eigen omgeving deurbrengen. De heer Lantinga dee vervolgens de suggestie om ni’je inwoners van Stellingwarf een routegids van heur naoste omgeving as welkomstkedo van de gemienten te geven.
Et eerste diel van de serie gaot deur et gebied tussen Tronde en De Hoeve en is 40 km; et twiede diel beschrift de route tussen De Hoeve en Blesdieke en is 36 km. Et ni’jste diel gaot deur et westelike diel van et stroomgebied van de revier en is 45 km. De routes sluten goed op mekeer an; et is meugelik om van de iene fietsroute veerder te gaon mit de volgende.
Veurdat liekewel et eerste exemplaor van de ni’je routegids overhaandigd wodde, vertoonde de auteur van de drie gidsen een speciaol ontwikkelde PowerPoint over et stroomgebied van De Lende. Daor wodde deur iederiene die disse biezundere aovend mitmaekte ommeraek van geneuten.
Eerder zorgde Lantinga al veur de routegidsen ’Kuieren in en om Wolvege’ en ’Langs oolde en ni’je hooltpaeden’. Mit de Lende-routegidsen is de suksesvolle serie routegidsen van de Schrieversronte now op tiene kommen. Veur de vormgeving van alle tien de gidsen zorgde Bauke Visser Koenders van Haulerwiek. De Schrieversronte is van plan en geef in 2017 opni’j twie routegidsen uut.