Redaktie
Stem op oonze projekten ‘Daor klept de klokke weer’ en ‘De Veerkieker’!
Now vri’jdag prissenteert de Schrieversronte tussen 15.30 en 18.00 ure 2 projekten: de film ‘Daor klept de klokke weer’ en ‘De Veerkieker’. Beide bin bedoeld veur et onderwies in Stellingwarf. De film vertelt over de biezundere periode rond 1500; De Veerkieker zorgt dat alle groepen in et basisonderwies ieder jaor naor een kulturele instelling gaon. Mit 19 ere projekten kommen we in anmarking veur subsidie van et Fonds Ooststellingwerf. Et pebliek kan op 4 verschillende projekten stemmen en bepaolt mit wie wel of gien subsidie krigt… Wi’j hopen dat jim oons steunen deur te kommen en op oonze projekten stemmen gaon! Plak: Rabobaankgebouw aan de Veengang 1 in Oosterwoolde.
Kleuters van De Riemsloot naor de Bargfeesten van Appelsche
Luusteren naor de aeventuren van Piepmoes en zien buurman de molle (foto: Lenus v.d. Broek)
De leerlingen van de groepen 1 en 2 van OBS De Riemsloot van Appelsche stonnen d’r vri’jdag mar zommers op. Dat kwam omreden ze as ofsluting van een muzikaol en zommers taelprojekt die dag de Bargfeesten van Appelsche vierden.
Veul enthousiasme bi’j de leerlingen! (Foto: Lenus v.d. Broek)
Mit mekeer zingen: ‘Wi’j gaon now op vekaansie mit Piepmoes en zien kammeraod’ (foto: Lenus v.d. Broek)
Et muzikaole taelprojekt wodde geven in et kader van arfgoededukaosie. Daans- en expressiedocente Lianne Jacobs uut Appelsche en Sietske Bloemhoff van de Stellingwarver Schrieversronte weren vier morgens in de weer mit dit deur heur speciaol ontwikkelde projekt. Et onderwarp van et projekt was et toerisme in Appelsche. Wat d’r in Appelsche allemaole te zien is was te heuren in lieties en verhaelties over Piepmoes. De Stellingwarver moes gaot mit zien buurman de molle op vekaansie naor Appelsche. De molle wil wel es zien as de dunen en bargen van Appelsche écht hoger binnen as zien mollebulte! En Piepmoes daenkt dat ze in Appelsche gien hinder hebben zullen van zien iewige vi’jaand Klaos Kaeter.
Zwemmen in et Bosbad! (Foto: Lenus v.d. Broek)
An de haand van de lieties en verhaelties leerde Lianne Jacobs op een slim levendige en enthousiaste wieze de kiender alderhaande muzikaole expressievormen an. Bi’j een zowat drie kertier durende slotveurstelling van et projekt dee blieken mit hoeveul plezier de kiender alles in vier morgens in heur opneumen hadden. De veurstelling wodde een groot sukses, en et pebliek dat uut veul oolden, bruurties, zussies, paken en beppen beston, zong dan ok uut volle bost et slotlied ’Gaon jim mit naor Appelsche’ mit.
Luusteren naor Lianne (foto: Lenus v.d. Broek)
Veul applaus en serpentines an et aende van de veurstelling (foto: Lenus v.d. Broek)
Et doel is dat et projekt ok an ere Stellingwarver basisschoelen anbeuden wodt. Et wodt dan inhooldelik anpast naor de omgevingssituaosie van die schoelen.
Harmen Houtman wint eerste pries van verhaelewedstried
Op vri’jdag 28 oktober kreeg Harmen Houtman tiedens een kulturele aovend de eerste pries uutrikt van een verhaelewedstried. Die wedstried wodde orgeniseerd deur STEM (Stichting Taalpodium Emmen). De uutrikkinge was in de Nacht van de Nacht in de Grote Karke in dat plak. Et thema van de verhaelewedstried was et toepasselike woord ’Donker/Duuster’. D’r weren mit mekeer rond de veertig inzendings.
Veur de kattegorie Streektael stuurde Houtman et verhael ’Een zaacht vellegien’ in. Prissentaoter Eric van Oosterhout, neerlandikus en borgemeister van de gemiente Hunze en AA, hadde veurofgaonde an de uutrikkinge een vraoggesprek mit Harmen Houtman. Die vertelde dat veural de Schrieversronte een enorme anvieterende rolle het bi’j et schrieven en et behoold van de Stellingwarver tael.
Nao et veurlezen van et winnende verhael kwammen de volgende opmarkings van de juryleden Jan Veenstra (Drentse schriever), Ton Peters (redaktie Roet/ schriever/dichter) en Coosje Hoekstra (schriever en redaktrice): ‘Een geweldig verhael mit een verrassend aende. De tragiek van de ienzemheid is goed weergeven. Et geft de stried tegen et noodlot goed weer. D’r is spraoke van een lakonieke meniere van vertellen. D’r is zeker gien drama kreëerd.’
Et winnende verhael staot mit vuuftien ere verhaelen in de bundel ’Duister’ die as op die aovend ok prissenteerd wodde. Tiedens de aovend weren d’r optredens van schriever A.L. Snijder (winner van de Constantijn Huygenspries in 2010), Jan Veenstra en Ton Peters. Veur meziek zorgde et Swing String Quartet.
Kursus Stellingwarfs uut aende
De kursus ‘Stellingwarfs veur beginners’ gong oflopen maendag uut aende in de Hoolten Klinte in Appelsche. Tiedens disse kursus is d’r veural ommedaenken veur et schrieven en praoten van die zo mooie oolde Nedersaksische tael. Dat pat wodt verzorgd deur dr. Henk Bloemhoff en Mark van Veen. Ien van de lesaovens is d’r liekewel ok andacht veur de geschiedenis van Stellingwarf. Dat onderdiel wodt verzorgd deur Geert Lantinga van Wolvege. Nao ofloop van de kursus verzorgt Lantinga butendat een exkursie in een Stellingwarfs netuurgebied. (Foto’s: Lenus v.d. Broek)