Aktiviteiten

aktiviteiten

Leerlingen Kampingerhofschoele op netuurexkursie

door

19meie2015

Harm Smid en Andries van der Veen mit leerlingen van de Kampingerhofschoele, links juf Tineke Nicolai. (Foto: Lenus van der Broek)

19-5-15

Kieken vanuut de voegelkiekhutte! (Foto: Lenus van der Broek)

19mei15

Andries van der Veen lat jonge slangegies zien. (Foto: Lenus van der Broek)

Deensdag 19 meie hul de Stellingwarver Schrieversronte de eerste netuurexkursie van dit jaor veur et basisonderwies in Stellingwarf. Disse eerste keer gong een groep leerlingen van de Kampingerhofschoele van Oosterwoolde et veld in mit de netuurkenners Andries van der Veen en Harm Smid uut Wolvege. Veurdat de groep o.l.v. heur juf Tineke Nicolai op ’e fiets naor et Fochtelervene ofzette, vertelde Harm Smid in schoele an de haand van een PowerPoint over voegels die in Stellingwarf veurkommen. Die PowerPoint wodde een peer jaor leden speciaol veur et basisonderwies ontwikkeld en klaormaekt deur voegelkenner en fotograaf Ruurd Jelle van der Leij. Deur de inleiding van Smid wodden de leerlingen al een betien op de hoogte brocht mit wat ze misschien in et Fochtelervene zien gaon zollen. In et Fochtelervene wodde vanuut de voegelkiekhutte uutkeken over et vene en wodden verschillende voegels zien, de brune kiekendief was daor iene van. Daornao wodde d’r een kuiertocht deur et venegebied holen waorbi’j Andries van der Veen o.e. vertelde over et veurkommen van verschillende slangen, zoas de ringslange en de adder. Op de foto lat Van der Veen een jonge adder en ringslange zien. En dat maekte vanzels een boel indrok bi’j de kiender!

De Lende in de jaorgetieden

door

14-9-2013 Annie Ligthart

Van maendag 18 meie tot en mit donderdag 25 juni is d’r bi’j de Stellingwarver Schrieversronte in Berkoop opni’j een biezundere tentoonstelling. In die periode bin daor tiedens kantooruren schilderi’jen te zien van Annie Ligthart van Oosterwoolde. De titel geft al an wat et onderwarp is; dat is et reviertien De Lende tiedens de vier jaorgetieden.

Annie Ligthart schildert veural op lekaosie, zodat veul meensken heur wel es troffen hebben bi’j de Lende. Alliend as et slimme koold is, dan fotografeert ze De Lende en warkt thuus heur fotografische gegevens omme tot een schilderi’j.

In Berkoop zullen zoe’n dattig van heur warkstokken te zien wezen; veur de bezukers is d’r een speciaole tentoonstellingswegwiezer. De toegang is ommenocht, de eupeningstieden bin van maendag t/m donderdag tussen 9.00 en 16.00 ure.

(Foto: Andries van Huizen)

Zoe’n 600 meensken kwammen naor de tentoonstelling ‘De Twiede Wereldoorlog in de regio’

door

De Blesse, 14415

Vanof 13 april tot en mit 26 april was d’r bi’j de Stellingwarver Schrieversronte in Berkoop de tentoonstelling  ’De Twiede Wereldoorlog in de regio’. Mit mekeer tegen de zeshonderd meensken kwammen naor Berkoop om die unieke tentoonstelling te bekieken. Roem twiehonderd d’r van weren leerlingen van tien basisschoelen uut beide Stellingwarven. Veur heur bezuuk was een speciaole lesbrief ontwikkeld, zodat alle verschillende onderwarpen van de tentoonstelling goed an bod kwammen. De leden van de warkgroep die de tentoonstelling inricht hebben, weren Hendrik Betten, Roelof Dragt, Pieter de Jong, Jan Menger en Jan de Vries. Zi’j weren ok tiedens de eupeningstieden altied bi’j de tentoonstelling betrokken,  zodat mit naeme de leerlingen mit heur eventuele vraogen bi’j heur terechte konnen. Soms kwam et ok veur dat ooldere bezukers spontaon de kiender vertelden over heur herinnerings an de periode 1940-1945. Die verhaelen maekten uteraord veul indrok. Uut de reakties het blieken daon dat d’r, bi’j de schoelen liekegoed as bi’j de ere bezukers, ommeraek veul wardering veur de tentoonstelling was. (Foto: Sietske Bloemhoff)

Veul belangstelling tentoonstelling WO2

door

16-4-15

Berkoop. Bi’j de Stellingwarver Schrieversronte in Berkoop is d’r ommeraek veul belangstelling veur de tentoonstelling rond de Twiede Wereldoorlog in de regio. Mit naeme veul basisschoelen maeken gebruuk van de gelegenhied om disse unieke tentoonstelling te bekieken. Veur heur bezuuk daor an is een speciaole begeleidende lesbrief ontwikkeld, zodat alle verschillende onderwarpen van de tentoonstelling goed an bod kommen. Soms komt et veur dat ooldere bezukers spontaan de kiender vertellen over heur herinnerings an de periode 1940-1945. Die verhaelen maeken uteraord veul indrok. Vri’jwilligers zorgen daornaost veur extra uutleg. De tentoonstelling is nog eupen t/m zundag 26 april, deur de weke van 9.00 tot 16.00 ure, in et weekaende van 13.00 tot 16.00 ure. De toegang is ommenocht.

Op ‘e foto: Jan Menger (De Blesse) geft uutleg an leerlingen van basisschoele ‘In de kring’ van Oosterwoolde (foto Sietske Bloemhoff).

Veul interesse veur tentoonstelling WO2

door

De Blesse, 14415

De Blesse, 14-4-15

Ok op de twiede dag van de tentoonstelling rond de Twiede Wereldoorlog in de regio bleek daor flink wat belangstelling veur te wezen. Naost mit naeme oolderen bezuken ok veul leerlingen van basisschoelen (op ‘ e foto die van de dörpsschoele van De Blesse) de tentoonstelling waor veul wardering van jong en oold veur is.

(Foto’s: Sietske Bloemhoff)