Jong van hatte mit et Stellingwarfs de toekomst in
aktiviteiten
Kommende donderdagaovend 16 april vertelt Niek van der Oord an de haand van een PowerPoint een uutgebreid verhael over de Joodse warkkaampen in oonze regio. Die lezing is bi’j de Stellingwarver Schrieversronte en begint om 20.00 ure. D’r is een beparkt tal stoelen; ie moe’n je daoromme even opgeven: info@stellingwarfs.nl, 0516-451108. De toegang is € 5,00.
Maendagmorgen 13 april eupende burgemeester Harry Oosterman van Oost-Stellingwarf een biezundere tentoonstelling rond de Twiede Wereldoorlog. Bi’j die eupening weren kiender van basisschoele De Lamer betrokken, zi’j warken dit veurjaor an een groot projekt rond die oorlog. Oosterman gaf an dat hi’j et van groot belang acht dat kiender weet hebben van die verschrikkelike periode 40-45. Dat oons laand now al 70 jaor niet betrokken west het bi’j oorlogen is best biezunder. Niet zoveer veur die tied haj’ ommes de Eerste Wereldoporlog en in de 19e ieuw was d’r ok nogal es oorlog. Vandaege-de-dag is d’r opni’j veul spanning in de wereld, zoas de situaosie in Oekraïne en die in et Midden-Oosten. De burgemeester komplementeerde daoromme et initiatief van de Stellingwarver Schrieversronte om een tentoonstelling te orgeniseren die mit naeme bedoeld is veur de kiender. De tentoonstelling wodde inricht deur de vri’jwilligers Jan Menger, Jan de Vries, Hendrik Betten, Pieter de Jong en Roelof Dragt, mit hulpe van Schrieversrontemitwarkster Saskia Douma.
Veur disse biezundere eupening hadde de Schrieversronte ok auteur Niek van der Oord nuugd. Van der Oord vertelde de kiender an de haand van een PowerPoint over de Joodse warkkaampen zoas die hier bi’jomme indertied veurkwammen. Die kaampen weren de plakken waor Joden eerst verzaemeld en an et wark zet wodden. Begin oktober 1942 bin alle meensken die in die kaampen zatten toegelieke vothaeld en ofvoerd naor Westerbork en vervolgens naor de vernietigingskaampen. De auteur van et krek opni’j verschenen boek ‘Joodse Werkkampen’ hadde ok een koffertien mitneumen. Dat koffertien wodde deur zien eigener in bewering geven doe hi’j naor Westerbork ofvoerd wodde. Et koffertien is d’r nog altied, de eigener is nooit weerommekommen. Et verhael maekte zichtber indrok op de kiender.
Nao de eupening konnen de leerlingen an de haand van een begeleidende lesbrief de tentoonstelling bekieken. Mit mekeer zullen zoe’n tien schoelen de tentoonstelling bekieken gaon. De tentoonstelling, die tot en mit 26 april duurt, is veur iederiene te bezuken. Dat kan van maen- tot en mit vri’jdag tussen 9.00 en 16.00 ure, in et weekaende van 13.00 tot 16.00 ure. De toegang is ommenocht.
Veur de foto’s van disse biezundere gebeurtenis zorgde Lenus van der Broek.
Jan Menger van Blesdieke (links) en Jan de Vries van Wolvege (rechts) zetten de laeste punties op de i. (Foto: Sietske Bloemhoff)
Kommende maendagmorgen 13 april eupent borgemeister Harry Oosterman van Oost-Stellingwarf bi’j de Stellingwarver Schrieversronte in Berkoop de tentoonstelling ‘De Twiede Wereldoorlog in de Stellingwarver regio’. Bi’j de eupening bin leerlingen van basisschoele ‘De Lamer’ van Ooldelaemer betrokken. De tentoonstelling, die gedurende 14 daegen te bezuken is, wodde inricht deur Jan de Vries, Jan Menger, Hendrik Betten, Roelof Dragt en Pieter de Jong, mit hulpe van Schrieversrontemitwarkster Saskia Douma. Deur de weke kun bezukers terechte van 9.00 tot 16.00 ure, op zaoterdag en zundag van 13.00 tot 16.00 ure. Mit mekeer zeuven basischoelen uut beide gemienten kommen de tentoonstelling bekieken; veur heur is een speciaole begeleidende lesbrief ontwikkeld.
De toegang is ommenocht.
Schrieversrontedirekteur Sietske Bloemhoff vertelde an et begin van de morgen over de Snuffelkursus die de laeste jaoren deur heir stichting anbeuden wodt. De kursus is niet alliend bedoeld veur ni’je inwoners van de regio, mar ok veur ere interesseerden die graeg es wat meer van de Stellingwarver streekkultuur weten willen. (Foto: Lenus v.d. Broek)
Veur de eerste inleiding over de geschiedenis van de Stellingwarven zorgde Geert Lantinga van Wolvege. De streekkenner bi’j uutstek maekte daorbi’j gebruuk van een prachtige powerpoint prissentaosie. Lantinga is ok kursusleider bi’j de kursus ‘Stellingwarfs veur beginners’. (Foto: Lenus v.d. Broek)
Op de aldereerste veurjaorsdag van dit jaor wodde bi’j de Stellingwarver Schrieversronte in Berkoop een biezundere Snuffelkursus geven. Disse ien dag durende kursus was speciaol ontwikkeld veur de raodsleden van de Stellingwarver gemienten en veur de staoteleden van de perveensie. Negen slim interesseerde raods- en staoteleden gavven heur op en kwammen morgens om tien ure bi’j mekeer om mit te doen. De kursus beston uut een mooi anbod op et terrein van de geschiedenis (brocht deur Geert Lantinga), de tael (Henk Bloemhoff) en de laandschopsgeschiedenis (lezing deur Dennis Worst). Dielnemers weren slim enthousiast over wat ze te heuren en te zien kregen. Nao et gemienschoppelike broodeten kreeg de kursus nog een levendig vervolg in de omgeving van de Katspoele in Ni’jberkoop, mit een netuurexkursie onder leiding van Freddie de Vries.
Ni’j initiatief Schrieversronte:
Op 18 juli in Appelsche: Stellingwarfs meziekfestival
Op zaoterdag 18 juli orgeniseert de Stellingwarver Schrieversronte veur et eerst een groot Stellingwarfs meziekfestival. Dit festival komt in de plak van Stellingwarfpop. De orgeniserende kemmissie van de Schrieversronte vun et tied wodden om veur een hiele ni’je formule te kiezen. Die kemmissie bestaot uut Klaasje Herder, Kjest Herder, Piet Tjassing en Sietske Bloemhoff. Ok singer-songwriter Serge Epskamp is bi’j de orgenisaosie betrokken.
Stellingwarfpop wodde zeuven keer holen
Stellingwarfpop was een festival dat mit naeme in de beginjaoren bedoeld was veur popmeziek. De laeste peer jaor kwam daor al wat veraandering in, zo deden d’r meer duo’s en singer-songwriters mit. Dat bleek de kwaliteit van et festival goed te doen, al bleef de hieltied nog popmeziek de boventoon voeren. Et leek de orgenisaosie beslist goed toe om et festival veerder te verbrieden. Daoromme is now besleuten veur een groot Stellingwarfs meziekfestival, daor bi’jglieks ok koren an mitdoen kunnen. Aenlik wodt mar mar iene vorm van meziek uutsleuten en dat is instermentaole meziek.
Wat overaende blift is de wedstriedvorm. Alliend is et now zo dat dielnemers an et festival niet per se an de wedstried mit hoeven te doen. Wat ok overaende blift is de veurweerde dat de dielnemers ien, of nog liever, meerdere Stellingwarfstaelige lieties naor veuren brenegn gaon. Wie an de wedstried mitdoen wil kan dat doen deur op zien minst ien ni’j lied naor veuren te brengen. Daorbi’j moet niet alliend de tekst, mar ok de meziek oorspronkelik wezen.
Rondtoer overdag
Et ni’je Stellingwarfs meziekfestival zal wezen op zaoterdag 18 juli. Overdag gaon de leden van de warkgroep mit mekeer op pad langs een tal Stellingwarver dörpen en zal daor veur flink wat verrassende aktiviteiten zorgen. Naor welke dörpen de groep percies gaot is now nog niet bekend, mar et zal in elk geval om een vuuf- tot zestal plakken gaon. De rondtoer is mit naeme bedoeld om flink reklame te maeken veur et festival aovens.
Et festival
Et festival zels is vanof vuuf ure op ien van de mooiste plakkies daorveur, en dat is de Boerestreek in Appelsche. D’r zal veur de verschillende optredens gebruuk maekt wodden van de ni’je meziekkoepel. Ok de omliggende horekabedrieven zullen bi’j et festival betrokken wodden, zodat et de 18e juli ien groot en gezellig feest wodden gaot op de Boerestreek! Et festival duurt tot aovens 11 ure.
Mitdoen
Iederiene die mit Stellingwarfstaelige meziek in de weer is kan an et festival mitdoen. Wie veur een pries in anmarking kommen wil moet daorveur op zien minst veur ien oorspronkelik Stellingwarfstaelig lied zorgen. Je opgeven kan tot 1 juni bi’j de Stellingwarver Schrieversronte; dat kan tillefonisch: 0516-451108, mar mailen naor info@stellingwarfs.nl het de veurkeur. Bi’j een teveul an dielnemers maekt de orgeniserende warkgroep uut wie an et festival mitdoen mag. Daorbi’j zal mit naeme keken wodden naor de verscheidenhied an mezieksoorten om zo veur een zo ofwisselend meugelik festival te zorgen.