Vandaege was et weer Gedichtedag. Deur et hiele laand henne weren d’r daoromme tal van aktiviteiten op et gebied van gedichten. De Stellingwarver Schrieversronte twitterde de hiele dag deur ieder ure een Stellingwarfs gedicht. Et idee daorveur wodde overneumen van kollega-instituut Tresoar in Liwwadden. Dat instiuut het ieder ure een Fries gedicht twitterd. De Stellingwarver gedichten die op Gedichtedag twitterd binnen, bin eerdaegs ok op StellingPlus nao te lezen.
Aktiviteiten
aktiviteiten
VERTEL MI’J WAT: kursus verhaelen vertellen
De Stellingwarver Schrieversronte orgeniseert i.s.m. Stichting Kunstwerf een kotte kursus ‘Verhaelen vertellen’ veur iederiene doe wat mit verhaelen vertellen doen willen zol: thuus, in et wark, in de buurt of in een verieninge, op schoelen, in zorgtehuzen… Verhaelen vertellen is van alle tieden, van alle streken, van alle meensken. Een verhael vertellen en luusteren naor een verhael – et is wat meensken bint. Vandaege-de-dag staot de keunst van et vertellen van verhaelen weer de hieltied meer in de belangstelling.
De kursus is op drie woensdagaovenden in et gebouw van de Schrieversronte in Berkoop. Et gaot om woensdag 13 feberwaori, 27 feberwaori en 6 meert, de hieltied van 20.00 tot 22.00 ure. Baukje Koolhaas (professioneel verhaeleverteller, docent en coach) begeleidet de dielnemers in et ontdekken en ontwikkelen van heur eigen stiel van vertellen. D’r is ommedaenken veur inhoold en opbouw van een verhael, taelgebruuk en woordkeuze, veurdracht en expressie.
Uutgangspunt van de kursus is: plezier in vertellen! De kursus richt him op: Wat vertel ie? Hoe vertel ie dat? An wie vertel ie? Iedere kursusaovend begint mit een deur Baukje zels verteld verhael, waorin een bepaold aspekt van et vertellen an bod komt. Daornao gaoj’ an et wark mit een verhael naor keuze. Ie kun zels een Stellingwarfs-, Fries- of Nederlaanstaelig verhael mitnemen, of kiezen uut anbeuden verhaelen in die drie taelen. Bi’j de verhaelen kan et gaon om volksverhaelen, historische verhaelen, ooit lezen verhaelen, of persoonlike verhaelen.
Vertellen is veural een kwestie van dóen. Dus is d’r veul aktie: opdrachten, oefenings, vertellen-veur-de-groep, leren mit mekeer en van mekeer – en veural ok van jezels.
Veur kursisten die vertellen willen veur pebliek orgeniseren we in overleg een kleinschaolig vertelpodium om heur verhaelen heuren te laoten.
De kosten van de kursus bin €35,-, inklusief koffie en thee.
Veur meer infermaosie kuj’ kontakt opnemen mit: Sietske Bloemhoff (Stellingwarver Schrieversronte: 0516-451108, of info@stellingwarfs.nl) of Baukje Koolhaas (Soelaes, verbinding met verbeelding: 06 24129520, o516 480929, of baukjekoolhaas@soelaes.nl. Zie ok www.soelaes.nl.
Stellingwarver Schrieversronte, Willinge Prinsstraote 10, 8421 PE Berkoop
Twiedehaans boeken te koop
Vanof maendagmorgen 14 jannewaori liggen d’r bi’j de Stellingwarver Schrieversronte in Berkoop tal van twiedehaans boeken te koop. Daorbi’j gaot et niet alliend om romans, verhaele- en gedichtebundels, mar ok om infermetieve boeken. De boeken kosten mar een euro et stok, dus griep je kaans! De aktie duurt twie weken, van maendag t/m donderdag, tussen negen ure morgens en vier ure middags. En… wie et eerste komt het de grootste keuze! (Foto’s: Lenus van der Broek)
Een ni’j begin maeken
De Stellingwarver dienst was in de oolde karke van Berkoop (foto: Lenus v.d. Broek)
Zundagmorgen wodde in de karke van Berkoop et jubileumjaor van de Stellingwarver Schrieversronte ofsleuten mit een Stellingwarver dienst. Een kleine veertig meensken weren naor de oolde karke kommen waor dr’Rienk Klooster uut Liwwadden een preek hul over een ni’j begin maeken. Hi’j hul et karkevolk veur daj’ je altied ofvraogen moeten: waor bin ik mit an de gang en wat zol ik ok al weer? Et is dan belangriek om naor je oorspronkelike uutgangspunt weeromme te gaon. Niet de deur verschillende tredisies vaaastestelde dogma’s doen d’r dan an toe, mar de oorspronkelike bosschop van rechtveerdighied en gerechtighied. De Stellingwarver lieten wodden goed mitzongen bi’j et orgelspul van Arend Doornheim uut Oosterwoolde.
Zoe’n veertig meensken maekten de dienst mit (foto: Lenus v.d. Broek)
Dr. Rienk Klooster uut Liwwadden: ‘Ie moe’n je altied ofvraogen: waor bin ik mit an de gang en wat zol ik ok al weer?’ (foto: Lenus v.d Broek)
De Stellingwarfstaelige lieten woddden goed mitzongen (foto: Lenus v.d. Broek)
Nao ofloop gongen de meerste bezukers mit naor et gebouw van de Schrieversronte om nog evenpies nao te praoten. Daor sleut Schrieversronteveurzitter Ype Dijkstra et jubileumjaor of mit eeen kotte toespraoke mit speciaole daankwoorden veur de meensken die de dienst mit meugelik maekt hadden omdat ok et geleuf een domein is waor de Schrieversronte him had veur maekt om de eigen tael bruken te kunnen. De preek van dr. Rienk Klooster zal in et feberwaorinommer van et Stellingwarver tiedschrift De Ovend opneumen wodden.
Schrieversronteveurzitter Ype Dijkstra sleut et jubileumjaor of en daankte iederiene die o.e. de Stellingwarver dienst mit meugelik maekt hebben (foto Lenus v.d. Broek)
Veurleesaktie Schrieversronte weer goed verlopen
Jannes Westerhof lest veur in Berkenstede (foto: Lenus van der Broek)
Veurleesaktie Schrieversronte weer goed verlopen
Op donderdag 27 en vri’jdag 28 december wodde weer op 26 plakken in de Stellingwarver verpleeg- en zorginstellings in Stellingwarf en in iene in Wilhelminaoord veurlezen deur roem twintig vri’jwilligers van de Stellingwarver Schrieversronte. De aktie is veural bedoeld om de bewoners een extra aktiviteit an te bieden in de soms wel es wat rustige daegen tussen kast en oold en ni’j. Mar daornaost ok om de meensken die in de zorg warken daormit een betien te ondersteunen.
Veur de veurleesaktie is een speciaole bundel mit verhaelen saemensteld, die alle jaoren anvuld wodt en die zo onderhaand al een hiel boekwark wodden is. In 2013 wodt de veurleesaktie veur de vuufde keer holen en zal d’r extra ommedaenken veur wezen.
Op ‘e foto’s bin een tal veurlezers en heur pebliek te zien op vuuf verschillende plakken in Wolvege.
Mark van Veen lest veur in de Lycklamastins (foto: Lenus van der Broek)
Henny Spijksma lest veur in Berkenstede (foto: Lenus van der Broek)
Titia Bijwaard las op twie plakken veur: in Berkenstede en in De Stoeke op Lindestede (foto: Lenus van der Broek)
Sjoukje Wouda en Janet Marks lezen veur op dagbehaandeling De Sluis in Lindestede (foto: Lenus van der Broek)