Pieter Jonker nemt ofscheid van Schrieversronte

Nao een dienstverbaand van 32 jaor nemt Pieter Jonker op 1 juli ofscheid as warknemer van de Stellingwarver Schrieversronte. Et officiële pat van de bi’jienkomst zal wezen in de karke van Berkoop, de receptie is daornao in en om et gebouw van de Schrieversronte. Tiedens et officiële pat zal d’r een ni’j boek verschienen over leven en wark van de Bulgaarse keunstener Peter Lazarov, hi’j is een goeie kammeraod van Pieter Jonker. Et boek verschient bi’j de stichting Nobilis en is schreven deur de vroegere direkteur van de Stellingwarver Schrieversronte. In de toekomst zal Pieter Jonker liekewel op sommige fronten aktief blieven veur de stichting, zo zal hi’j o.e. kursusleider blieven veur de kursus Stellingwarfs veur beginners. Op et mement zocht hi’j tegere mit Sietske Bloemhoff – zi’j volgde Jonker begin 2007 op as direkteur – naor de meugelikheden veur een boekuutgifte over de Stellingwarver keunstener Johannes Mulders. Veur et ofscheid op 1 juli wo’n zoe’n 230 personen verwaacht.

Twie pond ´n stuver komt d´r an!

An de jaorlikse boekekraante van de Stellingwarver Schrieversronte Twie pond ´n stuver wodt op dit mement weer drok warkt. In de twiede helte van augustus zal de kraante weer huus-an-huus verspreided wodden. Et meerste ommedaenken is vanzels ok dit keer veur de ni’jste uutgiften van de Stellingwarver Schrieversronte, die vanof 29 augustus weer zes aovens mit de boekekrojen van de sutelaktie langs tal van huzen kommen zal.

Losse verhaelen en gedichten te lezen van Stellingwarver schrievers

Sund half juni 2011 bin op de kattegerienen Leesklub en Schriefklub oolde en ni’je verhaelen van Stellingwarver schrievers te lezen. De Schriefklub, daor ok veul ni’j wark op te lezen is, wodt de hieltied uutbreided, wiels de Leesklub elke maond verni’jd wodden zal.

Op de Leesklub wodt wark plaetst van schrievers dat niet in boekvorm publiceerd is, mar wel in kraanten en/of tiedschriften. Et is allemaole opsleugen in et archief van de Stellingwarver Schrieversronte en onderhaand digitaliseerd deur mitwarkster Saskia Douma.

Op de Schriefklub wodt de hieltied ni’j wark van tal van schrievers en beginnende schrievers plaetst. Aj’ zin hebben om daor an mit te doen kuj’ je verhaelen, kollums of gedichten mailen naor info@stellingwarfs.nl. Is et je eerste keer, dan wel graeg even je naeme en adres vermelden!