Het haor gaot je ‘r stief van overaende een verhael uut de Leeuwarder Courant van vuuf juli 1986.
‘Vekaansie’, een verhael van Jouk uut 1990
In de rebriek ‘Op ‘e schostienmaantel’ van et Stellingwarver weekblad ‘Stellingwarf’ wodde in 1990 van Jouk (Martinus Bakker) een verhael over de vekaansie publiceerd. Wi’j’ et ok lezen? Klik dan op: Vekaansie
Sutelaktie gaot 26 augustus uut aende
Sutelaktie Schrieversronte gaot op 26 augustus uut aende
Op maendag 26 augustus gaot in de gemiente West-Stellingwarf weer de jaorlikse sutelaktie van de Stellingwarver Schrieversronte uut aende. Tiedens die aktie wo’n mit naeme de ni’jste boekuutgiften van de stichting huus an huus te koop anbeuden. Zoe’n 75 vri’jwilligers zorgen d’r alle jaoren weer opni’j veur dat veul meensken ok op disse wieze in de kunde kommen mit de Stellingwarver streektael en streekkultuur. Behalven boeken liggen d’r in de sutelkrojen ok cd’s, de ni’je Stellingwarver spreukekelender en et Stellingwarver tiedschrift De Ovend te koop. Veurdat ze op pad gaon kommen de sutelders eerst bi’j mekeer in et gebouw van de Schrieversronte in Berkoop. Mit een geweldige galp op de speciaole suteltoeter wo’n de sutelaktieweken elk jaor eupend.
De sutelaktie komt op 26 en 28 augustus en 2 september in: De Hoeve, De Langelille, De Oosterstreek, Munnikeburen, Noordwoolde, Scharpenzeel, Sliekenborg, Spange en een pat van Wolvege.
Op 4, 9 en 11 september wodt d’r suteld in: Appelsche-Zuud, Berkoop, Makkinge, Ni’jberkoop, Oosterwoolde-Zuud en Haulerwiek.
Onder anvoering van Schrieversronteveurzitter Ype Dijkstra blaost sutelvri’jwilligster Titia op de speciaole suteltoeter en kon de sutelaktie van 2012 beginnen! (Foto: Lenus v.d. Broek)
Keuperen ploert
Keuperen ploert
Wat hej’ oons
lange waachten laoten!
Muui van alle
natte daegen
koolde naachten
onbehaegen
d’r kwam gien aende an!
Now braan ie d’r op
mit baastend geweld
Verschruui ie,
verbraan ie
Et mooie, frisse, grune
zal in bruun vervaegen
En wi’j?
bin nog hieltied gien maoten
Blieven klaegen
Daor kuj’ van op an!
Attie Nijboer
Ommedaenken veur et Stellingwarfs in ‘Heerlijk Overijssel’
Ommedaenken veur et Stellingwarfs in ‘Heerlijk Overijssel’
Now donderdag is d’r in et tillevisiepergramme ‘Heerlijk Overijssel’ van RTV Oost o.e. ommedaenken veur et Stellingwarfs. In et live-pergramme zal Jan Koops van Oosterwoolde over et Stellingwarfs en de inzet van de Stellingwarver Schrieversronte veur de tael en streekkultuur vertellen.
‘Heerlijk Overijssel’ is een zommerpergramme van RTV Oost (de regionaole radio- en tillevisiezender van Overiessel), dat gedurende negen weken alle warkdaegen uutzunnen wodt. Et pergramme kent alle weken een aander thema, disse weke is et thema ‘Grenzeloos’ an bod. Alle daegen wodt uutzunnen vanuut een greensgebied mit een ere perveensie en mit Duutslaand. Op donderdag 8 augustus komt et pergramme live vanuut Ossenziel, en dat plak ligt an de greens mit et Stellingwarver pat van Frieslaand.
‘Heerlijk Overijssel’ is te gaaste bi’j Jachtwerf Vri-Jon Yachts, et pergramme begint om 17.21 ure.