Drones veur de naozorg

door

Van Klaas Boersma uut Oosterwoolde kregen we et volgende verhael:

DRONES VEUR DE NAOZORG

Om as voegelliefhebbers in de naozorg doeltreffend en zorgvuldig te wark te gaon hopen wi’j now gebruuk te maeken van drones. Wi’j willen gebruuk maeken van de meugelikheden, en perberen om zoe’n ding los te peuteren bi’j defensie. Ok al meugen wi’j him mar tiedelik bruken, ok dan zollen wi’j al slim bliede wezen. Veural now et zo slecht gaot mit de weidevoegels verwaachten wi’j wel wat mitwarking.

Mit zien beidend hebben wi’j een bepaolde hoeke laand. Lopen wi’j aanders kilometers op een dag, now gaon wi’j mit mooi weer et veld in, nemen een peer stoelties mit, en schieten drones de locht in. Iene van oons hoolt alles bi’j op et schaarm en verwarkt alle gegevens, de aander markeert de evt. nusten of haelt de stokkies weer op as ze niet meer neudig binnen.

Wi’j staon mit mekeer in kontakt vanzels, zodat degene die aachter et schaarm zit de aander naor et doel leiden kan. Was de naozorg al mooi en daankber wark, et kan dus nog plezieriger wodden. Men kan dus niet alliend doeltreffend en zorgvuldig te wark gaon, ok belangriek is dat d’r minder verstoring in et veld is. En… wat ok zo belangriek is, d’r ontkomt oons gien nussien.

In ieder geval, et is nog eventies ofwaachten as et lokt, mar wi’j bin d’r hielemaole klaor veur!

 

Foto’s van de maond

door

Van Harmen Houtman kregen we twie ni’je foto’s binnen:

heerenveen en omgeving 2 063

 

heerenveen en omgeving 2 064

 

Beide foto’s maekte Harmen kotleden van de ni’je ‘Laeste stuver’ bi’j de Scheene in West-Stellingwarf.

Voegelexkursie bi’j Appelsche, m.m.v. Ruurd Jelle van der Leij en Freddie de Vries

door

appelvink-2


Appelvinkien in Appelsche?

Foto: Ruurd Jelle van der Leij

Op zaoterdag 22 juni orgeniseert et pannekoekehuus De Oude Hof an de Boerestreek in Appelsche tegere mit de Stellingwarver Schrieversronte een biezundere aktiviteit. Die dag zal veural in et teken staon van de voegels die om Appelsche henne veurkommen (kunnen) én van ‘Et Stellingwarver Voegelboek’.. Et pergramme begint morgens om 10.00 ure mit koffie mit wat d’r bi’j en een inleidende powerpoint-prissentaosie over de voegelwereld in Stellingwarf, die deur de onderhaand laandelik bekende netuurfotograaf Ruurd Jelle van der Leij verzorgd wodden zal! Om 11.30 ure maeken de dielnemers o.l.v. Freddie de Vries, hi’j is de auteur van ‘Et Stellingwarver voegelboek’, een bustocht om Appelsche henne. Ien van de netuurgebieden zal beter bekeken wodden angaonde et veurkommen van de verschillende voegels daore.  Voegelkenner Freddie de Vries kan op een prachtige en kruderige wieze vertellen over dit zo interessaante onderwarp, dat de echte voegelliefhebber mag dit biezundere anbod aenlik niet missen!  Nao de exkursie  het de kok van De Oude Hof heerlike pannekoeken klaorstaon daor alle dielnemers onbeparkt van eten kunnen, mit daornao as naogerecht ies of koffie. Et hiele pergramme duurt tot omdebi’j vier ure.

De kosten veur disse unieke dag bin € 35,00 per persoon. Wie dit biezundere gebeuren mitmaeken wil, moet d’r as de kiepen bi’j wezen! Je opgeven kan tot 10 juni bi’j de Stellingwarver Schrieversronte in Berkoop. Dat kan deur te mailen naor info@stellingwarfs.nl, even bellen kan ok: 0516-451108. Nao et anmelden wo’n et definitieve pergramme en de nota naor jow toestuurd.

 

 

STELLINGWARFS VOLKSLIED OP CD

door

Al duurt et nog even veurdat ien en aander klaor is, et Stellingwarfs Volkslied zal nog dit jaor opneumen en op een cd uutbrocht wodden deur de Stellingwarver Schrieversronte. De cd komt in een speciaol 32 bladzieden tellend boekien mit daorin de tekst van et lied, infermaosie over et volkslied en de schriever daorvan H.J. Bergveld, mar ok is d’r ommedaenken in veur de biezunderheden van de Stellingwarver regio. Et idee hierveur komt van Magda Dullemond van Boompers en Bergveldkenner Henk Bloemhoff.

Et Stellingwarfs Volkslied zal in twie versies opneumen wodden; de eerste versie zal inzongen wodden deur een koor daor op dit mement al overleg mit is. De twiede versie wodt instermentaol, daorveur zal (een diel van) een körps zorgen. Veur de begeleidende teksten in et boekien zorgt Henk Bloemhoff van Oosterwoolde, de vormgeving is in hanen van Alain ter Schuur uut Wolvege, de opnaemen wo’n verzorgd deur Serge Epskamp van Casco Songs in Zaandhuzen.

(Laeter meer …)

TOMKE komt d’r an!

door

cover tomke17stellingwerfs HR (3)

 

‘Wat een keunst’ is de titel van et alderni’jste Tomke-boekien dat in de jaorlikse veurleesweke in juni weer an alle ukken van Stellingwarf rondpat wodden zal. Tomke is de naeme van een joongien dat mit zien kammeraoden Romke, et hontien, en Kornelia de kangeroe alderhaande aorige en spannende aeventuren beleeft. De prachtige verhaelties over Tomke en zien kammeraoties wo’n al sund jaor en dag schreven deur Auck Peanstra en Riemkje Hoogland. Tomke wodt uutgeven deur de Afûk in Liwwadden, de Stellingwarver Schrieversronte zorgt veur de Stellingwarver versie. Veur de vertaeling van de van oorsprong Friese verhaelties, vassies, lieties en spullegies zorgt Sjoukje Oosterloo van Drachten.

Tiedens de veurleesweke in juni zal weer in zowat alle Stellingwarver ukkespeulplakken veurlezen wodden. Niet alliend uut Tomke, mar ok uut Stellingwarver boekies as ‘Muske Tiemen’ van Christine Mulder. De veurleesweke is een initiatief van et Selskip foar Fryske Schriftekennisse, veur et Stellingwarver pat daorvan zorgen Wikje Haan van Oosterwoolde en Akkie Zijlstra uut Raevenswoold. An die veurleesaktie doen roem 20 vri’jwilligers van de Stellingwarver Schrieversronte mit.