280. BruunsHoghe & bruunshoge

door

Bi’j nommer 277 van Stellingwarfs in ’t wild gavven we al an dat d’r an de Kuunderweg bi’j Makkinge twie boerderi’jen mit elk een Stellingwarver naeme staon. As we goed teld hebben betekent dat 50% van die weg!

Bruuns Hoghe staot d’r op et veurhuus van de boerderi’je, mar op et infermaosiebod staot de naeme in wat ‘gewoner’ Stellingwarfs: bruunshoge. Disse (veld)naeme was al bekend bi’j de femilie Gorter doe et bedrief nog in hanen was van Albert Gorter, de pake van de boer van now. Gorter was indertied trouwens een hiel trouw lid van de woordeboekgroep van Makkinge. Die groep infermaanten het him, krek as de roem twintig ere woordeboekgroepen, jaorenlang inzet veur et Stellingwarfs Woordeboek. (Tekst en foto’s: Sietske Bloemhoff)

277. de olde kuunder

door

An de Kuunderweg bi’j Makkinge staon twie boerderi’jen mit een Stellingwarver naeme. Dit is de eerste, temeensen aj’ van de kaante van de Prikkedam kommen. De boerderi’je het de naeme de olde kuunder, en dat slat vanzels op de revier De Kuunder, die hier niet veer aachter de boerderi’je langes stroomt ligt. En op sommige plakken in de buurt bin nog stokkies van de oolde Kuunder te vienen, dus van veur de tied dat hi’j rechtetrokken is. Krek as bi’j ere naeme in disse rebriek is jammer genoeg ok hier ‘olde’ schreven in plak van ‘oolde’… (Tekst en foto’s: Sietske Bloemhoff)

279. ’t Fiene Hokkien

door

In Ni’jberkoop, bi’j de buurtschopTwietel, het indertied een hoolten karkien staon. Et wodde hier in 1932 bouwd veur een Evangelische Verieninge, op initiatief van de geriffermeerde karke van Donkerbroek en Ooldehoorn. In 1958 wodde et ofbreuken, omreden d’r doe gien diensten meer hullen wodden. Deur de Ni’jberkopers wodde et karkien al gauw ’t Fiene Hokkien nuumd.

Et bod dat an et karkien herinnert, is ok as eerbewies an Vrouw Maria Snoek plaetst; zi’j het heur eertieds jaoren veur de verieninge inzet. (Tekst en foto’s: Sietske Bloemhoff)

Jaorvergeerdering Schrieversronte 2021

door

Vanwegens corona mos de jaorvergeerdering van 2020 veurig jaor al een stokmennig keren uutsteld
wodden. Het bestuur wol graeg de jaorvergeerdering dit veurjaor holen, mar ok halverwege april
zaten wi’j nog in een ‘lockdown’. Gelokkig meugen we wat corona betreft weer bi’j mekeer kommen.

Het bestuur stelt daoromme veur om de jaorvergeerdering te holen op zaoterdagmiddag 25
september 2021 van 14.00 uur tot 17.00 uur in et MFA in Berkoop. Al van 13.30 ure of kuj’m een
koppien koffie kriegen.

De jaorverslaogen van 2019 en 2020 zullen die vergeerdering vaastesteld wodden, mar vanzels
maekt de SSR der ok een gezellige middag van mit veurdrachten. De ni’je directeur Abel Darwinkel
kan himzels die middag eindelik veurstellen an de leden van de Schrieversronte.

Jim bin’ der toch ok bi’j?

agenda-jaorvergeerdering-25-sept-2021.docxDownload

Te Keunst en te Kuier

door

De organisaosie en de dielnemers van et tuunfestival Te Keunst en te Kuier hebben niks te klaegen had! Niet an belangstelling, pattie meensken toogden langs pad en diek om keunst, kultuur en vermaek te snoeven en te erveren. Wat ok zeker mit zat was et prachtige naozoemerweer. De weergoden weren oons alderdeegst goed gezind. Beide daegen, 4 en 5 september scheen de zunne volop, dat de stemming zat d’r goed in.

Ok bi’j FriesGoed in Ni’jeberkoop waoras Grietje Bosma en ik, Attie Nijboer, tegere veurdregen mochten in de eigen streektael. De gedichten weren speciaol maekt veur disse tuunsessie, waorbi’j liekewel de omgeving en et thema ‘eupen’ een goeie bron veur inspiraosie weren.

Ik brocht daor o.e. een ode an FriesGoed en Grietje schreef een gevulig gedicht over de LHBTIQAPC vlagge die daor an de gevel wappert.

Ode an FriesGoed

FriesGoed
Goed Fries
Et parredies op eerde
Van Gerben en Janou

Mooi broesplak
Veur keunst en kultuur
Mit koulissen d’r ommetoe

Beider passie, liefde
En andacht veur netuur
Zo ludet heur webstee

Zette eerst de galerie
En laeter ok nog
De B&B uut stee

Et vri’je, kreatieve
Komt goeddiels
Van heur haand

Hi’j het ok
Zorg en oge
Veur de praktische kaant’

Heur boerderi’je is
Een kuuroord veur
Verbelinge en vertier

Welkom, FriesGoed is eupen
Vule jow thuus
Op jow eigen menier

Meenske en dier
Vienen hier
Heur gerak

Heur butenbad
Is een eupenbaoring
De steerns bin jow dak!

Hier in de midden
van de buurtschoppen
Iegypte en Frankriek

Kuj’ nog votdromen
Kom ie tot heerlik tot rust
Is al et mooie binnen haandberiek

Zorgzem is hier de maot
Fietsen, kuieren of luibuizen
Meugelikheden te over, in overvloed.

FriesGoed
Goed Fries
Alles is goed
En niks moet!

eupen wezen
(de lhbtiq+vlagge op disse lokaosie)

“et gaor over oonze twiede dochter
makkelik vienen we et niet
mar we gaon et mit jim delen
dan biwwe et ok mar kwiet

ze is verliefd,da’s niet bezunder
mar ingewikkeld is et wel
hi’j is nog man
mar zit in et verkeerde vel

zien naeme anpast, dat gong makk’lik
mar et aander zomar niet
zien huwelik is al naor de knoppen
en ok zien kiender hebben verdriet

en now trof hi’j oonze dochter
ze wodden verliefd, ja allebeide
op man? of vrouw? wie zal et zeggen?
of bin et einliks now twie meiden…?

laoten we d’r eupen over wezen
en et oonze vrunden zeggen
dan kuwwe d’r mit mekere over praoten
en hoeven we laeter niks meer uut te leggen”.