Redaktie

SSR geft twie ni’je routegidsen uut

door

Twie ni’je routegidsen:

P1010887, Drents-Friese Woold

Fietsen in en om Appelscha (foto: Jan Koops)

 Afbeelding18, pad Hooltpae

Langs oolde en ni’je Hooltpaeden (foto: Geert Lantinga)

In de twiede helte van meie verschienen d’r bi’j de Stellingwarver Schrieversronte opni’j twie routegidsen. Jan Koops van Oosterwoolde schrift een prachtig fietsroute om Appelsche henne, mit as titel In en om Appelscha. De route komt deur historisch interessaante dörpsgebieden van Appelsche, mar gaot ok deur et Fochtelervene, deur Veenhuzen en de Kaele Dunen. Omreden de tetaole lengte van de fietsroute goed 60 km is, het Koops meugelikheden in de gids angeven om de route te verkotten. De routegids geft behalven de route ok veul infermaosie over de gebieden daor aj’ al fietsende langes kommen en is veurzien van prachtige foto’s. De gids is Nederlaanstaelig, telt 32 bladzieden en gaot € 7,50 kosten.

Toegeliekertied verschient ok de ni’je routegids Langs oolde en ni’je Hooltpaeden. Geert Lantinga zorgt mit disse gids opni’j veur een unieke kuier deur mit naeme de bossen en paeden van Hooltpae en Ni’jhooltpae. De kuier gaot langs plakken daor aj’ gewoonlik niet zo gauw terechte kommen zullen, en lat opni’j zien hoe prachtig Stellingwarf is. In de gids vertelt Lantinga over de slim interessaante historie van et gebied, mar het ok ommedaenken veur de netuur. Ok disse routegids is Nederlaanstaelig, wodt 64 bladzieden dikke en gaot € 8,50 kosten.

In 2015 geft de Stellingwarver Schrieversronte opni’j drie routegidsen uut. Bi’j de eerste twieje gaot et om de omgeving van Haulerwiek en Noordwoolde; de dadde zal in drie anienslutende dielen de naoste omgeving van de revier De Lende beschrieven.

In de serie verschenen eerder De buurtschappen van Oosterwoolde, Wandelen rond Wolvega en Taalfietstocht rond Berkoop.

Lovend juryrappot veur ‘Winterwille’

door

Zundagmiddag 30 meert wodde in De Boerderij naost de prachtige Fraeylemaborg in Slochteren de winner van de Streektaelpries van et Dagblad van et Noorden bekend maekt. In een goed verzorgd kultureel pergramme en een volle zael wodde nao et schoft et juryrappot van alle zeuven nommeneerden veurlezen. Et Stellingwarver kienderboek ‘Winterwille’ was daor iene van. Juryveurzitter Eric van Oosterhout, hi’j is burgemeester van de Drentse gemiente Aa en Hunze, gong naodat hi’j een uterst goed pleidooi hul angaonde et belang van streektaelen over tot et veurlezen van et juryrappot. De jury (mit as leden behalven Van Oosterhout o.m. Gerard Stout en Tonko Ufkes) vun van ‘Winterwille’et volgende:

Een Stellingwerver versie van het Okki en Taptoe winterboek voor kinderen. Afgestemd op de doelgroep tussen vier en twaalf jaar. Puzzels, natuur, liedjes, gedichten, voorleesverhaelties. Optimisme straalt van elke bladzijde. Heel afwisselend en een geweldige stimulans voor het Stellingwerfs, een voorbeeld voor de andere regionale talen. Een doe-boek.

Van Oosterhout gaf an dat de jury et verschrikkelik lastig vunnen had om een winner an te wiezen. D’r moest keuzen wodden uut poëzie, proza en boeken veur kiender. Et was et vergelieken van appels, peren en proemen, zo zee de juryveurzitter. De pries wodde uuteindelik uutrikt an de Drentse dichteres Suze Sanders veur heur boek ‘Veenbraand’.

In 2015 zal de Streektaelpries veur de tiende keer uutrikt wodden.

DSC_9097, 30-3-14, nom. Ww

Et juryrappot van de Streektaelpries van et Dagblad van et Noorden wodt veurlezen deur juryveurzitter Eric van Oosterhout. (Foto: Lenus v.d. Broek)

DSC_9093, Freylamaborg

Zes van de negen mitwarkers van ‘Winterwille’ weren naor Slochteren kommen. V.r.n.l.: Herma Egberts, Nanda van Gestel, Sjoukje Oosterloo, Christine Mulder, Sietske Bloemhoff en Xavière Kolk. Ok et dochtertien van Xavière was mitkommen. (Foto: Lenus v.d. Broek)

 

 

Catch the Wind in ’t Stellingwarfs op nommenaosie in Plein 5!! Tip: stem d’r op as ’t even kan!!

door

Van 3 meert of tot 29 meie kuj’ de hieltied, van maendag tot vri’jdag, een ‘evergreen’ heuren, ommezet in iene van de streektaelen van Nederlaand. Dat is op Plein 5, Radio 5 Nostalgia. Ie kun elke weke stemmen op je eerste keur, via de poll op plein5.ncrv.nl. Wi’j roepen jim allemaole ommeraek op: doe mit en stem disse weke op Catch the Wind, et meraokels poëtische en wereldberoemde nommer van de Schotse zanger Donovan, en, hiel biezunder, speciaol uutvoerd deur oonze Stellingwarver troubadour Henk Bloemhoff in et Stellingwarfs. Donderdag zal d’r een fragment  van te heuren wezen in Plein 5, tussen 14.15 en 14.30 ure. Help mit om dit lied in et Stellingwarfs stevig op ‘e kaorte te zetten en stem de kommende weke op Vang de Wiend / Catch the Wind! Disse verkiezings bin misschien te winnen, en et is mooi as oonze regio goed naor veuren komt!

Op vri’jdag wodt de winner van de weke bekendmaekt. Dan kuj’ ok et hiele nommer dat in disse weke de meerste stemmen kregen het, nog es weer heuren. De volgende weken kommen d’r weer aandere dielnemers. De winners van de weke gaon deur naor de finale op Hemelvaortsdag, 29 meie.

image7, Henk

De vertaeling ‘Vang de Wiend’ maekte Henk Bloemhoff an et aende van de jaoren zeuventig. Hi’j schrift en zingt et liefst eigen wark, mar Catch the Wind dee him wel zo vule dat d’r een vertaeling kwam. In 2005 het hi’j et speciaol opneumen en uutbrocht op de cd Dag Stellingwarvers! Die is nog altied te koop bi’j de Stellingwarver Schrieversronte, mit bekende nommers as Waor de Lende, Makkinge en Vremde Ofgeunst. In de jaoren tachtig maekte Henk Bloemhoff tegere mit zien zuster Sietske, mit zangeres Renny Krediet en aanderen de lp’s Singeliers en In Twielochten.

Henk Bloemhoff is in 1966 as folksinger in et Engels begonnen en zong zodoende op zien achttiende al riegelmaotig Donovan-nommers as Catch the Wind, Colours, Universal Soldier en Josie. Hi’j zong daornaost ok al gauw Nederlaanstaelige nommers en ontwikkelde een repertoire in et Stellingwarfs. Logisch, want de tael die him et eigenst was drokte  et meerst en et makkelikste uut wat hi’j zingen wol en wat hi’j daor dan bi’j beleefde. Stellingwarfstaelige nommers van him die in de regio grote bekendhied kregen, weren o.e. Waor de Lende, Stellingwarver onzinnig draanklied, Hujjinge, Aarme Doeve, De groeten, tot kiek, Hille van De Langelille, Vremde Ofgeunst en Veurjaor.

De Stellingwarver Schrieversronte is slim bliede mit et ommedaenken dat Plein 5 mit zien uutzendings an de streektael- en kultuur van Nederlaand geft. Zo wodt ja de weerde van de streektael de hieltied meer onder de meensken bekend maekt, ok et laandelike pebliek. Et sluut prachtig an bi’j de doelen van de Schrieversronte.

Prachtige plaeties van de dörpen van Stellingwarf

door

DSC_8934, 27-3-14

Donderdagaovend 27 meert was d’r in et gebouw van de Stellingwarver Schrieversronte in Berkoop een biezundere aovend mit Jan Koops van Oosterwoolde en Jan de Vries van Wolvege. Zi’j leuten tegere een riegel van meer as twiehonderd prachtige foto’s en prentbriefkaorten zien uut alle negenendattig dörpen van Stellingwarf. Et pergramme van de beide manluden was een soorte van ‘verlengstok’ van heur gezaemelike boek ‘De dörpen van Stellingwarf in oolde beelden’ dat een peer jaor leden uutgeven wodde. Roem twintig belangstellenden kwammen op de aovend of.

De eerstvolgende lezing die bi’j de Sschrieversronte holen wodt is op donderdagaovend 24 april. Dan vertelt de bekende historikus dr. Wiebe Bergsma, hi’j is verbunnen an de Fryske Akademy en oold-inwoner van Haulerwiek, over de veraanderings nao et begin van de Reformaosie.

Foto: Lenus v.d. Broek

Lende-symposium: eerste ankondiging

door

image0-003

De Stellingwarver Schrieversronte orgeniseert op vri’jdag 14 november in ’t Vlechtwark in Noordwoolde een symposium mit as thema de revier De Lende. De revier zal die dag vanuut verschillende invaalshoeken belocht wodden. Zo is d’r vanzels veul ommedaenken veur de geschiedenis d’r van en de laandschopselementen, mar dat is d’r bi’jglieks ok veur verhaelen en gedichten die de revier as onderwarp hebben. Inleidings bin d’r o.e. van Dennis Worst, Geert Lantinga, Jan Slofstra en Henk Bloemhoff. Mit eren is d’r op dit mement nog overleg. Et idee veur et symposium is ontstaon vanwegens de grote interesse van de lezers van et Stellingwarfs tiedschrift De Ovend. In dat blad is d’r deur et hiele jaor henne ok op alderhaande wieze ommedaenken veur De Lende en dat bliekt arg an te slaon. Meer ni’js over et symposium volgt laeter.