Redaktie – Pagina 214 – StellingPlus.nl

Veurleesaktie Schrieversronte goed slaegd

10 januari 2014 door Redaktie

Op woensdag 8 en donderdag 9 jannewaori weren de jaorlikse winterveurleesdaegen die deur de Stellingwarver Schrieversronte orgeniseerd wodden. In twie daegen tied gongen zoe’n twintig veurleesvri’jwilligers van de stichting naor alle zorginstellings van Stellingwarf, en iene in et angreenzende Wilhelminaoord. Tiedens de veurleesdaegen wodt an verschillende groepen veurlezen uut een speciaole veurleesmappe, die ieder jaor anvuld wodt mit ni’je verhaelen.

Dit winterseizoen wodde veur et eerst veurlezen in jannewaori en dat het van weerskaanten goed voldaon. Tiedens de evaluaosie zal bekeken wodden hoe en wanneer de aktie in et ni’je winterseizoen weer an de vörke steuken wodden zal.

Jim zien hieronder foto’s van de veurleesaktie, die Lenus v.d. Broek in drie Stellingwarver zorginstellings maekte.

Wiesje Mulder las veur in Berkenstede in Wolvege

Albert Oost las veur in Rikkingehof in Oosterwoolde (foto’s), mar ok in Sinnehiem in Haulerwiek

Jannie Lenstra las veur in Lyclamastins in Wolvege

Kursus ‘Vertel een verhael’

8 januari 2014 door Redaktie

Kursus ‘Vertel een verhael’

Veur de twiede keer zal professioneel verhaelevertelster Baukje Koolhaas (zie foto) een kursus ‘Vertel een verhael’ in oonze regio verzorgen. De eerste keer gong et om een warkwinkel die uut twie aovens beston, en aenlik was die tied krek te kot. De ni’je kursus zal daoromme uut vier aovens bestaon. In de kursus kommen d’r verschillende menieren van vertellen an bod. Zo is d’r ommedaenken veur et vertellen van een verhael in et algemien, mar ok veur et vertellen an verschillende doelgroepen en leeftieden. Tiedens de kursus kan ieder zien eigen tael gebruken. Baukje bruukt et Nederlaans, mar is ok thuus in et Fries en et Nedersaksische Sallaans, dat vanzels veul van et Stellingwarfs weg het.

Veur meer info verwiezen we graeg naor de webstee van Baukje www.soelaes.nl, ie moe’n dan even in de linkerkolom et woord ‘vertelling’ anklikken.

De kursus ‘Vertel een verhael’ is op woensdagaovend 12 en 19 feberwaori en 5 en 12 meert, de hieltied van 19.30 tot 22.00 ure. De kosten bin € 40,00 per persoon, koffie/thee inbegrepen. De kursus wodt geven in et gebouw van de Stellingwarver Schrieversronte in Berkoop. An de kursus kun hooguut 12 personen mitdoen. Wie mitdoen wil kan him tillefonisch (0516-451108) of via de mail (info@stellingwarfs.nl) anmellen.

Winterse veurleesdaegen op 8 en 9 jannewaori

6 januari 2014 door Redaktie

Woensdag 8 en donderdag 9 jannewaori wo’n weer de winterse veurleesdaegen van de Stellingwarver Schrieversronte holen. Zoe’n twintig vri’jwilligers gaon dan langs alle Stellingwarver verzorgingshuzen om daor veur te lezen uut een grote keuze an winterse verhaelen. Veur et eerst bin de veurleesdaegen niet in december, omreden de beschikbere daegen veur de aktie dit keer slim ongeunstig uutvullen. N.a.v. de erverings van dit keer wodt bekeken as et niet mooier of beter is om de aktie in et vervolg altied in jannewaori te holen. De veurlezers kriegen elk jaor een ni’je anvulling veur de veurleesmappe.

Kulturele ni’jjaorsaovend Schrieversronte

6 januari 20146 januari 2014 door Redaktie

Op zaoterdagaovend 25 jannewaori hoolt de Stellingwarver Schrieversronte heur kulturele ni’jjaorsaovend in ’t Vlechtwark in Noordwoolde. Op dit mement is de warkgroep Publiciteit nog doende mit de laeste veurbereidings, mar zeker is dat d’r optredens wezen zullen van et mingd koor van Hooltpae, et körps van Makkinge, én de Stellingwarver schriever Freddie de Vries. De aovend is in et eerste plak bedoeld veur de leden van de Schrieversronte, mar veural ok veur meensken die van doel binnen om lid te wodden (€ 18,00 in et jaor). De aovend en et eerste bakkien koffie/thee is ommenocht, aj’ now lid binnen of niet. Om de aovend financieel meugelik te maeken hoolt de warkgroep een verlotting, en dat kun de leden d’r van as gien aander! Op donderdagaovend 9 jannewaori stelt de warkgroep Publiciteit et definitieve pergramme van zaoterdagaovend 25 jannewaori vaaste. Jim kun dat dan in de daegen daornao lezen op disse webstee!

Boekbiendersmanifestaosie bi’j Schrieversronte

6 januari 2014 door Redaktie

Boekbiendersmanifestaosie bi’j de Stellingwarver Schrieversronte

Bi’j de Stichting Stellingwarver Schrieversronte (SSR) in Berkoop verschient in de eerste helte van 2014 een boek mit wark van bekende Stellingwarver dichters en keunsteners. Veur et wark dat in Van schossel tot slingerpad opneumen is, hebben Roely Bakker (gedichten), Peter Hiemstra (beelden), Christiaan Kuitwaard (schilderi’jen), Christine Mulder (gedichten), Marjolein Spitteler (mingde techniek) en Willem Jan Teijema (gedichten) heur inspireren laoten deur et thema ‘Ruumte’. Et boek is an et aende van jannewaori klaor, mar wodt pas prissenteerd tiedens de eupening van ‘Eupen Stal’ 2014. Dat komt omreden an et verschienen van Van schossel tot slingerpad een boekbiendersmanifestaosie koppeld is. Iene van de belangriekste onderdielen van die manifestaosie is een wedstried haandboekbienen.

Vervolgens ligt et in de bedoeling om tiedens de tentoonstelling Eupen Stal in 2014 et boek, de kunstwarken én de rissultaoten van de haandboekbiendmanifestaosie (mit katalogus) te prissenteren. Eupen Stal is dit jaor van 12 juli t/m 10 augustus.

Biezundere pebliekspries

An de manifestaosie is een pebliekspries verbunnen. Veur de deur et pebliek van Eupen Stal uutkeuzen inzendings wo’n deur de drie keunsteners en dichters speciaol drie kombinaosies van gedichten en keunstwarken maekt.

Et mitdoen an de wedstried

Iederiene kan an de wedstried haandboekbienen mitdoen, ammeteurs liekegoed as professionals. Veur wie graeg mitdoen wil volgen hier de technische gegevens:

– et boek telt 56 bladzieden, die drokt binnen op 150 grams hooltvri’j MC mat.

– et fermaot is 24 x 24 cm.

– de katernen bin volen en niet perforeerd.

– veur de schutblaeden bin twie blanko dubbelvellen beschikber

De kosten om mit te doen bin € 20,00. Die bin bedoeld veur et toesturen van de katerns, et weerommesturen van et boek, mar ok veur de katalogus die vlak veur Eupen Stal begint verschienen zal en de dielnemersformelieren. Et bedrag kan overmaekt wodden op NL26FRBK0299807711 t.n.v. Stichting Stellingwarver Schrieversronte.

Anmellen kan bi’j de Stellingwarver Schrieversronte, o.v.v. Boekbiendersmanifestaosie. Et adres is: Willinge Prinsstraote 10, 8421 PE Berkoop / Oldeberkoop

Je opgeven kan ok via de mail: info@stellingwarfs.nl

Veur meer info kuj’ bellen: 0516-451108, even vraogen naor Sietske Bloemhoff

Naodat de € 20,00 overmaekt binnen wo’n de katerns rond 1 feberwaori toestuurd. Veur 15 meie 2014 moet jow inzending bi’j de Schrieversronte binnen wezen.