Redaktie

Lies Boersma, rechts op ‘e foto, beschreef heur biezundere leven an now toe in ‘t Is genoeg west… Veur de Stellingwarver bewarking d’r van zorgde Sjoukje Oosterloo (links).  Foto: Lenus v.d. Broek)

Vri’jdagmiddag 29 november verscheen bi’j de Stellingwarver Schrieversronte in Berkoop et ni’jste boek’t Is genoeg west…, een autobiografische roman van Lies Boersma uut Noordwoolde. Et boek vertelt et biezundere verhael van Lies, die opgruuide in et westen van Stellingwarf-Westaende, en die nao een mooie, mar ok deur et geleuf strakke, jeugd in een huwelik belaande dat heur slim ongelokkig maekte. Et ni’je boek wodde de schriefster anbeuden deur Attie Nijboer, twiede veurzitter van de Stellingwarver Schrieversronte. Veur de Stellingwarver bewarking zorgde Sjoukje Oosterloo uut Drachten.  Et boek is een echte anraoder, telt 176 bladzieden en kost € 12,50. Et is te koop bi’j de Schrieversronte in Berkoop, Primera in Noordwoolde, Bruna Oosterwoolde en The Readshop (Zwikstra) in Wolvege.

’t Is genoeg west…

Autobiografische roman van Lies Boersma

 Lies Boersma, onder die schoelnaeme schreef een inwoonster van de gemiente West-Stellingwarf een roman over heur biezundere leven. Lies gruuide op in een karkelik gezin waor ze heur in heur kienderjaoren goed en veilig vuulde. Mar as ze wat oolder wodt en omgang krigt mit een aorige jonge die van huus uut niet karkelik is, wodt et allemaole aanders. Toch besluut ze om heur oolden heur zin te geven en maekt de verkering uut. Wat laeter gaot ze in de zorg warken en krigt kunde an een ere jonge, die wel karkelik is. Ze trouwt mit him, ze verhuzen naor een ere perveensie en kriegen kiender. Dan bliekt al gauw de relaosie toch niet goed te gaon en wodt ze vaeke vernederd deur heur man. Lies zocht hulpe en krigt die ok. Nao veul ellende en overwegings besluut ze uuteindelik om op te stappen, ’t is genoeg west. Nao jaoren komt ze weeromme naor Stellingwarf en ontmoet, al moet et zo wezen, heur eerste liefde… Een indrokwekkend en waor gebeurd verhael, een anraoder om te lezen! Et boek telt 176 bladzieden, veur et omslag zorgde Sietske Bloemhoff.

’t Is genoeg west… verschient op vri’jdagmiddag 29 november. Et kan kocht wodden bi’j de Schrieversronte in Berkoop, Bruna Oosterwoolde, Primera Noordwoolde en The Readshop in Wolvege. Et boek kost € 12,50.

Wethoolder Sierd de Boer van Stellingwarf-Oostaende rikte de pries uut an Sjoukje Oosterloo. (Foto: Lenus v.d. Broek)

Vri’jdagaovend 22 november wodde de Stellingwarver Schrieveri’jepries uutrikt an Sjoukje Oosterloo van Drachten. Zi’j wun de literaire pries mit heur spannende verhael ‘Duvelskeunsten’. Neffens juryveurzitter Peter Riksma wodde al riekelik gauw dudelik veur welk verhael de pries wezen moest. Et verhael is goed van opbouw, de spanning verflauwt niet en et Stellingwarfs is op kundige wieze bruukt, neffens de uut drie personen bestaonde jury.

Wethoolder Sierd de Boer van Oost-Stellingwarf rikte de pries en bi’jheurende oorkonde uut an de winneres, die angaf d’r slim wies mit te wezen. Mit mekeer leverden elf meensken wark in veur de pries. De feestelike aovend wodde muzikaol opfleurd deur Carolien Hunneman, die speciaol veur heur optreden uut Finlaand overkwam.

Jelke Nijboer, de veurzitter van de warkgroep H.J. Bergveldpries eupende de aovend. Rechts de prieswinneres Sjoukje Oosterloo. (Foto: Lenus v.d. Broek)

De jury van de Stellingwarver Schrieveri’jepries 2013: v.l.n.r. Abel Darwinkel, Ferdinand de Jong en juryveurzitter Peter Riksma. (Foto: Lenus v.d. Broek)

Carolien Hunneman verzorgde veur heur fan Sjoukje Oosterloo en alle ere gaasten een prachtig optreden. Carolien was daorveur speciaol uut Helsinki overkommen. (Foto: Lenus v.d. Broek)

Et verhael ‘Duvelskeunsten’ is te lezen in et decembernommer van et Stellingwarfs tiedschrift ‘De Ovend’. Et blad verschient in de eerste weke van december en wodt verstuurd naor de leden van de Stellingwarver Schrieversronte. Losse exemplaoren kun veur € 3,50 kocht wodden bi’j de Schrieversronte in Berkoop, Bruna Oosterwoolde en The Readshop in Wolvege.

‘Winterwille’: Stellingwarfs winterboek veur kiender prissenteerd

Woensdagmiddag 20 november wodde toegeliekertied in de boekwinkels The Readshop (Wolvege) en Bruna (Oosterwoolde) et ni’je kienderboek ‘Winterwille’ prissenteerd. Dat gebeurde op een wat ere wieze as gebrukelik; onder kiender die naor de boekwinkel toekwammen wodden in beide winkels vuuf van de ni’;je boeken verlot. Mitwarkers an et boek dielden daorveur eerder op de middag in de winkel en op straote flink wat lotties uut, zodat in beide winkels een hiele groep kiender de spannende verlotting mitmaekten. Behalven de tien ni’je boeken stelde de Stellingwarver Schrieversronte, de uutgever van ‘Winterwille’ ok tien ere Stellingwarver kienderboeken veur de verlotting beschikber. Veur de inhoold van et winterboek ‘Winterwille’ zorgden: Herma Egberts, Nanda van Gestel, Xavière Kolk, Christine Mulder, Ruurd Jelle van der Leij, Sjoukje Oosterloo, Frank Spijkers, Freddie de Vries en Sietske Bloemhoff.

De prissentaosie van ‘Winterwille’ bi’j The Readshop in Wolvege, foto: Lenus v.d. Broek

Nanda en Frank dielen in Wolvege lotties uut om een mooi boek mit te winnen, foto: Lenus v.d. Broek

Sjoukje en Xavière (mit zeuntien Raphael) bi’j Bruna in Oosterwoolde, foto: Sietske Bloemhoff

Gezellige ‘Winterwille’-drokte bi’j boekhaandel Bruna in Oosterwoolde, foto: Sietske Bloemhoff 

Uut elf inzendings veur de Stellingwarver Schrieveri’jepries 2013 is die van schriefster Sjoukje Oosterloo uut Drachten as de alderbeste anwezen. Mit et verhael ‘Duvelskeunsten’ wint Oosterloo daoromme de Stellingwarver Schrieveri’jepries 2013. De pries zal op vri’jdagaovend 22 november tiedens een feestelike bi’jienkomst in de biebeltheek van Oosterwoolde an heur uutrikt wodden. (Laeter meer…)