Redaktie

‘Wat een keunst’ is de titel van et alderni’jste Tomke-boekien dat in de jaorlikse veurleesweke in juni weer an alle ukken van Stellingwarf rondpat wodden zal. Tomke is de naeme van een joongien dat mit zien kammeraoden Romke, et hontien, en Kornelia de kangeroe alderhaande aorige en spannende aeventuren beleeft. De prachtige verhaelties over Tomke en zien kammeraoties wo’n al sund jaor en dag schreven deur Auck Peanstra en Riemkje Hoogland. Tomke wodt uutgeven deur de Afûk in Liwwadden, de Stellingwarver Schrieversronte zorgt veur de Stellingwarver versie. Veur de vertaeling van de van oorsprong Friese verhaelties, vassies, lieties en spullegies zorgt Sjoukje Oosterloo van Drachten.

Tiedens de veurleesweke in juni zal weer in zowat alle Stellingwarver ukkespeulplakken veurlezen wodden. Niet alliend uut Tomke, mar ok uut Stellingwarver boekies as ‘Muske Tiemen’ van Christine Mulder. De veurleesweke is een initiatief van et Selskip foar Fryske Schriftekennisse, veur et Stellingwarver pat daorvan zorgen Wikje Haan van Oosterwoolde en Akkie Zijlstra uut Raevenswoold. An die veurleesaktie doen roem 20 vri’jwilligers van de Stellingwarver Schrieversronte mit.

Van twie van de negen lieties die uutkeuzen binnen veur de finale van et Drents lietiesfestival schreef Serge Epskamp uut Zaandhuzen de meziek. Et gaot daorbi’j om de meziek van et lietien ‘Kledder’, dat zongen wodt deur Annemiek Drenth, en waorvan Ria Westerhuis de tekst schreef, én om de meziek van ‘Zun in de snoet’. Dat lietien wodt zongen deur Thyan Drupsteen, zi’j is de dochter van Delia Bremer die veur de tekst van et lietien zorgde.

De finale is op donderdag 9 meie, en zal aovens uutzunnen wodden op RTV Drenthe. Serge Epskamp begeleidt tiedens die finale niet alliend Annemiek Drenth, mar ok, tegere mit Rob Zandgrond en Ruud Fieten, Thyan Drupsteen. Aorig is dat niet alliend Serge, mar ok Rob Zandgrond en Ruud Fieten in oonze omkrieten niet onbekend binnen. Krek as Serge deden ok zi’j mit an Stellingwarfpop; tegere vormen Rob en Ruud et niet onbekende The Jetfarm. Butendat begeleidde Rob Zandgrond doe ok zangeres Sietske Sietsma en zi’j wunnen doe de twiede pries.

Alle negen uutkeuzen lieties veur et Drents lietiesfestival bin now al te heuren op de webstee van RTV, en d’r kan butendat ok now al op die lieties stemd wodden.

Et festival wodt orgeniseerd deur et taelinstituut Huus van de Taol, de Drentse kollega’s van de Stellingwarver Schrieversronte.

Al in 2008 verscheen in een uniek saemenwarkingsverbaand mit de Historische Verieninge van Oosterwoolde bi’j de Stellingwarver Schrieversronte de routegids ‘De buurtschappen van Oosterwolde’. Die gids wodde doe uutgeven naor anleiding van et plaetsen van de dattien prachtige infermaosiebodden over de buurtschoppen van Oosterwoolde, die ok vandaege-de-dag nog altied in of bi’j die buurtschoppen te vienen binnen. In de gids wodt een route langs al die buurtschoppen beschreven, mar d’r wodt tussendeur ok alderhaande infermaosie geven over de gebieden daor de route langes gaot. De gids is Nederlaanstaelig, mar veur et Stellingwarfs is in et boekien veul ommedaenken.  De routegids wodde in een haandzem fermaot uutgeven, en past percies in de (jasse)buse! Veur de routegids was en is ok now nog altied flink belangstelling. De route langs de buurtschoppen van Oosterwoolde is 26 kilemeter.

Wolvege en Berkoop

Et doel is dat in de julimaond de Stellingwarver Schrieversronte twie ni’je routegidsen prissenteren zal. Veur een routegids rond en diels deur Wolvege zorgt kenner van dat gebied bi’j uutstek Geert Lantinga. Et gaot in dit geval om een unieke kuiertocht, die veural om Wolvege hennegaot. Lantinga het liekewel de tocht zo opbouwd dat, veur die dat wil, ok een route deur et dörp volgd woddden kan. Ok in disse routegids wodt arg veul interesaante infermaosie over et gebied en et laandschop daor de route langs lopt opneumen.

Datzelde gelt ok veur de taelfietstocht om Berkoop henne, veur die routegids zorgt Sietske Bloemhoff. Ok in die gids wodt zorgd veur flink wat aachtergrondinfermaosie, mar d’r zullen ok mit naeme biezunderheden angaonde de Stellingwarver tael in opneumen wodden.

Beide routegidsen zullen, krek as de eerste, Nederlaanstaelig wezen, mar veur et Stellingwarfs is d’r veul ommedaenken in de vorm van toepasselike verhaelen en gedichten. Et uutgeven van beide gidsen is financieel mit meugelik maekt deur de Rabobaank.

Et doel is dat in 2014 opni’j twie routegidsen uutgeven wodden: iene rond Appelsche, de ere langs de klokkestoelen van Stellingwarf.