Algemien

Op vri’jdagaovend 19 september orgeniseren de Fryske Krite van Oosterwoolde en de Stellingwarver Schrieversronte opni’j een kulturele aovend. In aktiviteitencentrum ‘De Miente’ in Oosterwoolde vertelt Auke Zeldenrust over zien biezundere boek ‘Dorp achter de tralies’, wiels Jan Koops een PowerPoint prissentaosie vertonen zal van zien verzaemeling oolde prentbriefkaorten van omdebi’j honderd jaor leden van Oosterwoolde.

Auke Zeldenrust brocht in 2012 tientallen daegen deur in de PI in Liwwadden, gewoonlik De Marwei nuumd. In die gevangenis zitten 248 manluden vaaste veur hiele verschillende misdaoden. Zo zitten d’r dieven, drugshandelers, beroepskriminelen en moordeners opsleuten. Tegere mit de roem twiehonderd meensken die in de gevangenis warken, vormen de gevangenen een appatte saemenleving, een dörp aachter de trallies. Zoas in veul dörpen en steden, warken hier ok een dokter, een tandarts en een kapper. D’r bin karkediensten, sporttoernooien en heite- en kienderdaegen. Journalist Auke Zeldenrust interviewde gevangenen, bewaekers en mitwarkers, en neteerde die in zien boek. In Oosterwoolde vertelt hi’j in et Fries over zien aeventuur.

Jan Koops zorgde tegere mit Jan de Vries veur et boek ‘De dörpen van Stellingwarf in oolde beelden’, dat de Stellingwarver Schrieversronte in 2012 uutgaf. In et boek bin tal van biezundere foto’s en prentbriefkaorten opneumen van alle 39 Stellingwarver dörpen. In 2000 kwam van him et boekien ‘Oosterwoolde – zo was het’ uut. Van zien woonplak Oosterwoolde het Jan Koops een ommeraek biezundere verzaemeling prentbriefkaorten, daor hi’j in et Stellingwarfs over vertellen zal.

De kulturele aovend begint om 20.00 ure, leden van de Fryske Krite en de Stellingwarver Schrieversronte betaelen € 5,00, veur niet-leden is de intree € 7,50.

Maendagmiddag zette om goed vier ure veur de veertigste keer de sutelaktie van de Stellingwarver Schrieversronte uut aende. Ok al leek de kaans groot dat d’r veul regen kommen zol, et bleef de hiele aovend dreuge. Veurzitter Ype Dijkstra vertelde in zien toespraokien veurof slim bliede te wezen mit de deur de jaoren henne altied weer trouwe opkomst van alle vri’jwilligers die disse belangrieke aktie mit meugelik maeken. Zonder heur geweldige inzet zol zoe’n sutelaktie ommes niet holen wodden kund, zo zee hi’j. Ieder jaor opni’j helpen zoe’n 80 vri’jwilligers mit an de sutelaktie. Dijkstra prees liekewel ok de mitwarkers van kantoor die vanzels ok ieder jaor aorig wat uut de wege zetten. De sutelaktie wodde ok disse veertigste keer weer ‘inblaozen’ deur een beste galp te geven op de speciaole suteltoeter. Dit keer was de eer an Johan Veenstra om daor veur te zorgen; Johan sutelde vanof de eerste sutelaktie alle keren én alle daegen mit. Op ien keer nao dan, dat was in et jaor dat zien mem slim ziek in et ziekenhuus lag.

Iene van de vri’jwilligers wodde deur Ype Dijkstra nog even speciaol in et zunnegien zet. Et gong om Jan Punter van Oosterwoolde, die jaorenlaank  veur de sutelkrojen zorgd het en die ok de hieltied naor de dörpen brocht waor suteld wodde. Omreden zien gezondhied et niet meer toelat, moest Jan Punter et besluut nemen om mit zien sutelklus te stoppen.

De opbrengst van de eerste sutelaovend was mitien al goed, d’r wodde veur een kleine € 2000,00 verkocht. Opvalend was et grote tal routegidsen dat verkocht is, mar ok de Stellingwarver Spreukekelender wodde, krek as ere jaoren, mitien al best verkocht.

Kommende woensdag is de twiede suteldag, de krojen rollen dan deur de straoten om Haulerwiek henne, deur De Fochtel en in een pat van Oosterwoolde.

Oflopen zundagaovend, kot nao et ofsluten van Eupen Stal, wodden tiedens een speciaole bi’jienkomst bi’j de Stellingwarver Schrieversronte in Berkoop de pebliekspriezen bekendmaekt van de manifestaosie haandboekbienen. Veertig professionele en ammeteur haandboekbieners stuurden daorveur heur wark in. In de vier weken durende keunstroute weren al die veertig haandbunnen boeken tentoonsteld in de grote zael van et gebouw van de Schrieversronte. Et pebliek van Eupen Stal mocht mit mekeer uutmaeken naor wie de pebliekspriezen gaon zollen. Veur et in te bienen boek weren losse katerns beschikber steld van et keunstboek ‘Van schossel tot slingerpad’, dat oflopen veurjaor deur de Stellingwarver Schrieversronte uutgeven wodde. De meerste stemmen gongen naor Eva Kipp (Kloosterburen), de twiede pries was veur Baukje Scheppink (Haddegeriep) en de dadde pries gong naor Lenie Stamhuis uut Garnwerd. Veur de drie winners hadde de SSR drie keunstwarken en gedichten beschikber steld van Peter Hiemstra en Christine Mulder, Marjolein Spitteler en Willem Jan Teijema, en Christiaan Kuitwaard en Roely Bakker. Deur een vakjury wodde eerder, bi’j de prissentaosie van ‘Van schossel tot slingerpad’, op de eupeningsdag van Eupen Stal op 12 juli, et wark van An Taveirne (Brugge), Harrie Knoors (Roermond) en Sacha de Ven (Aduard) as beste anwezen. Uut et pebliek dat de formelieren invulde t.b.v. de pebliekspriezen bin acht naemen lot. Die acht meensken wodt een kursus haandboekbienen anbeuden. De kursus wodt op 8 november in Berkoop geven deur Jan Bosch en Corrie Los van de Stichting Haandboekbienen.

Op ‘e foto hierboven het Sacha de Ven krek de pries veur winneres Eva Kipp in ontvangst neumen, omreden laestnuumde mit vekaansie is. Links van heur de maeker van et keunstwark Peter Hiemstra en rechts dichteres Christine Mulder. Hiemstra leut him deur een gedicht van Mulder inspireren en verwarkte ok de tekst daorvan in zien keunstwark.

Roem veertig haandboekbieners en ere belangstellenden maekten de priesuutrikkinge mit. Rechts veuran Jan Bosch, veurzitter van Stichting Handboekbinden.

Veur de drie pebliekspriezen die beschikber steld binnen deur de Schrieversronte zorgden Marjolein Spitteler/Willem Jan Teijema (zie foto), Peter Hiemstra/Christine Mulder en Christiaan Kuitwaard/Roely Bakker. 

Van de veertig dielnemers an de manifestaosie haandboekbienen weren neffens et pebliek van Eupen Stal dit de inzenders van et beste wark:

1. Eva Kipp

2. Baukje Scheppink

3. Leny Stamhuis

4. Annina Lingsma

5. Jan Bosch

6. Ans Buiting

7. Sacha de Ven

8. Jaap v.d. Visch

9. Hanneke Rutges

10. Duelles (Eva Kipp en Sacha de Ven)