Algemien

Sutelaktie 2012 begint goed!

door

Sutelaktie 2012 begint goed!

Maendagaovend 27 augustus was de eerste in een riegel van zes sutelaktie-aovenden die de Stellingwarver Schrieversronte ok in zien jubileumjaor orgeniseert. Zoe’n 22 vri’jwilligers gongen mit noflik sutelweer op pad in de dörpen Blesdieke en Wolvege. Toppers in de verkoop weren, zo dee nao ofloop blieken, et krek verschenen boek De dörpen van Stellingwarf in oolde beelden en de Stellingwarver Spreukekelinder. De opbrengst was disse eerste aovend mitien al goed, d’r wodde veur een kleine € 3.000,00 verkocht. Woensdagaovend is de twiede sutelaovend, ok die is in Stellingwarf-Westaende. 

Sutelder Jannes Westerhof (links) en boekebak-klaormaeker Hendrik Betten inspekteren nog even de bakken. (Foto: Lenus van der Broek)

Sutelders Pieter Dijkstra (links) en Marten Vonk doen heur eerst nog even tegoed an wat lekkere bolties veurdat ze de streek op gaon. (Foto: Lenus van der Broek)

Onder anvoering van Schrieversronte-veurzitter Ype Dijkstra blaost Titia Bijwaard op de suteltoeter en kan de sutelaktie 2012 uut aende gaon! (Foto: Lenus van der Broek)

Op een peer nao alle sutelders van maendag 27 augustus; op de veurgrond Koop Oosterloo van Wolvege, die veur de routes en indieling van de ploegen zorgde. (Foto: Lenus van der Broek)

De dörpen van Stellingwarf in oolde beelden

door

De dörpen van Stellingwarf in oolde beelden

Mit plaknaemeverklaorings

Op donderdagaovend 23 augustus verscheen et 153e boek dat de Stellingwarver Schrieversronte in zien veertigjaorige bestaon uutgeven het. De prissentaosie was in kefé-resteraant Boszicht in Ni’jberkoop, et kleinste dörpien van de gemiente Oost-Stellingwarf. In et ni’je boek bin van alle negenendattig Stellingwarver dörpen schitterende foto’s en ofbelings van prentbriefkaorten opneumen. De meersten daorvan kommen uut de verzaemelings van de beide auteurs, dat bin Jan Koops van Oosterwoolde en Jan de Vries van Wolvege. Mar ok flink wat personen, dörpsarchieven en historische verienings verlienden veul mitwarking deur ok prachtige foto’s beschikber te stellen en deur veur anvullende infermaosie te zorgen. Een mooie en biezundere anvulling in et boek is ok de mitwarking van dr. Henk Bloemhoff, taelkundige veur et Stellingwarfs. Bloemhoff dee et oflopen half jaor (opni’j) onderzuuk naor de naemgeving van de dörpen, de uutkomsten daorvan bin in et boek opneumen. Veur de prachtige vormgeving van et boek zorgde Bauke Visser Koenders van Haulerwiek, et wodde drokt bi’j drokkeri’je Banda in Et Vene.  Et ni’je boek dat 168 bladzieden telt kost € 17,50 en is rondomtoe te koop bi’j de boekwinkels én in de jaorlikse sutelaktie die de kommende weken holen wodt.

Vlak veur de prissentaosie zorgde et dri’jorgel Grote Dorus veur feestelike klaanken bi’j kefé Boszicht in Ni’jberkoop (foto: Lenus van der Broek)

Zoe’n tachtig belangstellenden maekten de prissentaosie van ‘De dörpen van Stellingwarf in oolde beelden’ mit (foto: Lenus van der Broek)

Schrieversronte-veurzitter Ype Dijkstra hadde veul lof veur de mitwarkers an et boek (foto: Lenus van der Broek)

Van links naor rechts: Bauke Visser Koenders, Jan Koops, Jan de Vries en Henk Bloemhoff hebben krek de eerste exemplaoren van et ni’je boek uutrikt kregen deur SSR-veurzitter Ype Dijkstra (foto: Lenus van der Broek)

Film ‘De Stelling en de Zwatte dood’ op StellingPlus te zien

door

De Stellingwarver film ‘De Stelling en de Zwatte dood’ is now ok op StellingPlus te zien. Et verhael van de film, die maekt is deur William Higgins van Oosterwoolde, en die prissenteerd wodde op de Stellingwarver Dag van oflopen 7 juli, is baseerd op een legende uut et boek ‘De Grijpvogel’ van Han Wielick. De Stellingwarver teksten van de heufdrolspeulers bin inspreuken deur Femmie van Veen (Hooltpae), Klaas Dijkstra (Langedieke) en Jitze Hofstra (Oosterwoolde). Veur de vertaeling van alle filmteksten in et Stellingwarfs zorgde Sietske Bloemhoff. Et doel is dat William Higgins (van huus uut Engels- en Twentstaelig) i.s.m. de Stellingwarver Schrieversronte veur meer Stellingwarver films zorgen zal.

‘De Stelling en de Zwatte dood’ is te vienen onder de rebriek ‘Beeld en geluud’.

Foto’s Stellingwarver Dag

door

Foto’s: Lenus van der Broek

Op zaoterdag 7 juli was d’r, vanwegens et 40-jaorig bestaon van de Stellingwarver Schrieversronte, een grote Stellingwarver Dag. Die dag was heufdzaekelik in en om et gebouw van de Schrieversronte in Berkoop, mar wodde mit een feestelike kulturele aovend ofsleuten in Hotel Holland Inn in Wolvege.

Et morgenpergramme gong uut aende mit een gesprek dat veurzitter Ype Dijkstra hadde mit zowat alle oold-veurzitters. Nao een gezellige en reünie-achtige lunch konnen de dielnemers an de Stellingwarver Dag mitdoen an een kulturele busreize, een taelfietstocht of een dörpskuier.

Vanof zes ure dee een grote groep van meensken mit an een overheerlik lopend buffet bi’j  Holland Inn, waor om acht ure de feestelike kulturele aovend beginnen zol. An die aovend deden o.e. vier schrievers mit en wodde de alderni’jste Stellingwarver film prissenteerd.

Tegen twaelf ure gongen de laeste feestgangers op huus an, an een prachtige Stellingwarver Dag was een aende kommen…

Een uutgebreid verslag kuj’ lezen deur even te klikken op: Feestelike Stellingwarver Dag