Achtste ienakteraovend op 14 december

Op vri’jdagaovend 14 december is et alweer toe an de achtste ienakteraovend, die de Stellingwarver Schrieversronte dit jaor orgeniseert vanwegens et 40-jaorig jubileum. Op die aovend zullen d’r twie ienakters speuld wodden. De deur Harmen Houtman schreven speciaole jubileum-ienakter Veertig jaor, et fesien zal naor veuren brocht wodden deur T.Z.N., de tenielploeg van De Hoeve. De tenielklub ‘De hoek van Zevenwouden’ van Berkoop speult de hilarische ienakter De schriever veur et dörpsbelang van Trinus Riemersma. Die ienakter wodde indertied deur Sjoukje Oosterloo ommezet van et Fries in et Stellingwarfs.

Et doel was dat de aovend holen wodden zol in Berkoop, mar omreden daor (nog) gien geschikte ruumte veurhanen is, wodt d’r uutweken naor et MFC in Ni’jhooltpae.

Disse veurlopig laeste ienakteraovend kan d’r vanzels ok weer luusterd wodden naor prachtige meziek, daorveur zorgt et Onderdukerskoor van Berkoop. Tiedens de aovend zorgt de warkgroep Publiciteit opni’j veur een grote verlotting daor hiel veul mooie priezen mit te winnen binnen. Et pergramme begint om acht ure, de toegang is ommenocht.

De Ovend van december komt d’r an!

In de eerste weke van december verschient et laeste nommer van et Stellingwarver tiedschrift De Ovend van dit jaor. In ‘Et veuroffien’ kikt Schrieversronte-veurzitter Ype Dijkstra op et biezundere jubileumjaor weeromme. In et nommer is weer een grote verscheidenhied an artikels, verhaelen en gedichten opneumen. Zo is d’r een slim lezensweerdig artikel te lezen van dr. Oebele Vries over ‘De perochies van et vri’je Stellingwarf, in et biezunder West-Ni’jberkoop’. Redakteur Jannes Westerhof het et mit Jan de Vries van Wolvege over ‘Dit plak dot me wat’, Lily Köhler zorgde weer veur een mooie kollum en Willem Jan Teijema schreef twie prachtige sfeervolle gedichten. Mar d’r is vanzels nog veul meer in et twienendattig bladzieden tellende tiedschrift te zien en te lezen! 

De Ovend is te koop veur € 3,50 bi’j o.e. boekwinkel Bruna in Oosterwoolde en The Readshop in Wolvege. Wie liekewel lid is van de Stellingwarver Schrieversronte krigt De Ovend zes keer in et jaor toestuurd veur € 18,00.

Tegen de 120 meensken maekten prachtige ienakteraovend in Blesdieke mit

Veur dit mooie fotoalbum van de ienakteraovend in Blesdieke zorgde Lenus van der Broek

Tegen de 120 meensken maekten prachtige ienakteraovend in Blesdieke mit

In de tot een echte tenielzael ommebouwde loods van mechanisaosiebedrief Demmink wodde oflopen zaoterdagaovend een prachtige ienakteraovend holen. Et gong alweer om de zeuvende ienakteraovend, die de Stellingwarver Schrieversronte dit jaor vanwegens zien 40-jaorig jubileum orgeniseert. Disse aovend was keuzen veur een wat ere opzet as de zes eerdere aovenden. Zo las veur et schoft de suksesvolle schriefster Sjoukje Oosterloo veur uut eigen wark. Zoe’n 120 meensken geneuten van heur vaeks humoristische verhaelen over daegelikse dingen, die veur veul meensken hiel herkenber bleken. Slim aorig was ok heur verhael over et kesteel van kesteelheer Gregorius dat in Blesdieke staot. Nao et optreden van Oosterloo was d’r een al even mooi optreden van singer-songwriter Serge Epskamp uut Zaandhuzen. Van him verscheen kotleden de prachtige cd ‘Oer’, mit daorop tien lieties in et Aachterhoeks, en daorvan leut Epskamp een flink tal heuren.

De prissentaosie was disse aovend in hanen van Schrieversronte-direkteur Sietske Bloemhoff, die o.e. heur grote wardering toonde veur mechanisaosiebedrief Demmink. Vanwegens et leeg- en schonemaeken en et inrichten tot een tenielzael kon de loods twie daegen niet deur et bedrief bruukt wodden. ‘Dat zoks in disse tied nog allemaole meugelik is, is echt fantastisch,’ neffens Bloemhoff. ‘Ok deur zoe’n inzet blift een dörp leefber en dat bliekt hier vanaovend in Blesdieke meer as.’

De Pollepraoters

Nao et schoft was et de beurt an de tenielspeulders van de Pollepraoters van Blesdieke zels. Zi’j brochten de kolderieke ienakter ‘De schriever veur et dörpsbelang’ naor veuren. Die ienakter, die indertied schreven wodde deur de Friese schriever Trinus Riemersma, vertelt et verhael van Gerben Turksma, hi’j is ankommend schriever. Nao de zaekelike vergeerdering van et Dörpsbelang lest Gerben et pebliek een stokkien veur uut eigen wark. En omreden hi’j een beginneling is hoopt hi’j op reaksies uut de zael. Now, en die krigt hi’j ommeraek! Aenlik vienen de meensken uut et dörp et hiele verhael van Turksma mar niks. De ien nao de aander levert kritiek en vint dat bepaolde passages uut et verhael schrapt wodden moeten. De kritische dörpsbewoners wodden ommeraek goed daelezet deur de speulders van Blesdieke, zodat de ienakter tot zien volle recht kwam. De ienakter wodde indertied vanuut et Fries in et Stellingwarfs ommezet deur Sjoukje Oosterloo.

De aovend wodde ofsleuten mit gezellige meziek van Easy-Eric, zodat de laeste Blesdiekigers dikke nao twaelven op huus angongen. Veul meensken gongen butendat mit een mooie pries naor huus, want de warkgroep Publiciteit van de Stellingwarver Schrieversronte had ok now weer veur een antrekkelike verlotting zorgd.

Zundag 13 jannewaori: Stellingwarver dienst in Berkoop

Op zundagmorgen 13 jannewaori is d’r in de karke van Berkoop een Stellingwwarver dienst. Domenee Rienk Klooster gaot veur in de dienst, die om half tiene begint. Et onderwarp van disse biezundere dienst is ‘Een ni’j begin maeken’. Veur dat onderwarp is keuzen naor anleiding van Mattheus 4: 12-25. De Stellingwarver dienst kan zien wodden as de ofsluting van et jubileumjaor van de Stellingwarver Schrieversronte.