Warkwinkel Veurlezen het goed voldaon

image4-001

Schriefster Riemkje Hoogland het tal van tips angaonde et veurlezen uut Tomke an ukken.

Kotleden wodde in et gebouw van de Schrieversronte in Berkoop een warkwinkel ‘Veurlezen’ holen. Die warkwinkel wodde alle vri’jwilligers die mitdoen an de verschillende Stellingwarver veurleesakties anbeuden deur It Selskip foar Fryske Schriftekennisse. Dit ‘Selskip’ orgeniseert al sund jaor en dag de Friese veurleesweke in juni; in die weke wodt veural veurlezen an ukken uut et boekien ‘Tomke’ dat jaorliks verschient. De Schrieversronte het him een jaor of wat leden bi’j disse prachtige aktie ansleuten en ok in zowat alle Stellingwarver ukkespeulplakken en plakken veur kienderopvang wodt in juni uut Tomke veurlezen. De Schrieversronte stelt ok al weer zoe’n zeuven jaor et Tomke-boekien, dat uutgeven wodt deur de Afûk, veur alle ukken beschikber. Veur de Stellingwarver vertaeling van Tomke zorgt Sjoukje Oosterloo uut Drachten. De veurleesaktie wodt in Oost-Stellingwarf koördineerd deur Akkie Zeilstra van Raevenswoold, wiels Wikje Haan uut Oosterwoolde de orgenisaosie in West-Stellingwarf veur heur rekening nemt.

image0-002

Geeske Frieswijk (links) van It Selskip faor Fryske Schriftekennisse is dé grote moter aachter et Tomke-veurleesaktie in juni

Tiedens de warkwinkel vertelde schriefster Riemkje Hoogland over waor as veurlezers allemaole mit te maeken kriegen kunnen. Wat doej’ as kiender inienen ofleided binnen, en waor moej’ rekening mit holen as et om de alderkleinsten gaot. ‘Maek gebruuk van verschillende aorige attributen,’ raodde ze an. ‘Dit jaor is et thema van et ni’je Tomke-boekien ‘Keunst’, maek bi’jglieks gebruuk van een mooie ‘Keunstdeuze’, waor van alles inzitten kan.’

image2-001

Wat et ok altied goed dot, is de een ‘verteljasse’, daor aj’ van alles in verbargen kunnen, en die aj’ de hieltied anpassen kunnen naor et thema, of naor et seizoen:

image9-001

Nao heur uutleg en tips zette Hoogland de veurlezers an et wark, in groepies van twieje mossen stokken tekst uut speciaol uutzochte Stellingwarver verhaelen veurbereided wodden.

image5-001

image8-001

image3-001

Daornao  lazzen alle veurlezers heur stokkies tekst die in twietallen veurbereided weren an mekaander veur en wodden veural alle goeie veurbeelden daoruut be- en toelocht. Want et wodde mitien dudelik dat d’r an de Stellingwarver veurleesakties arg goeie veurlezers mitdoen… Van de kaante van Frieswijk en Hoogland was daor dan ok ommeraek veul wardering veur. An et aende van de warkwinkel bleek dat alle goeie veurleestips, alle idenen om et hiele gebeuren henne, en et mit mekeer uutwisselen van erverings de veurlezers arg goed voldaon het. Et ligt dan ok in de bedoeling om mit een jaor opni’j een Warkwinkel Veurlezen te orgeniseren. Mit een peer weken verschient et alderni’jste Tomke-boekien.

Foto’s: Sietske Bloemhoff

 

Eerste Stellingwarver E-boek: Daor klept de klokke weer – H. Hoogeveen / H.Koopmans

Et eerste Stellingwarver E-boek is d’r! Daorveur zorgde Hans Koopmans van Oosterwoolde, die indertied et kienderboek van H. Hoogeveen vertaelde in et Stellingwarfs. Die versie wodde in 2009 uutgeven in et kader van ‘Stellingwarf 700’.  Now, vier jaor laeter in 2013, verschient et spannende boek ok as E-boek:

Daor klept de klokke weer – H. Hoogeveen_ H. Koopmans

Sluut alle deuren mar

Harmen Houtman

‘Sluut alle deuren mar’

 

Refrein:

Sluut alle deuren mar,

doe alle raemen toe,

kom bi’j me zitten, hier dicht’ bi’j de heerd.

‘k Doe alle keerzen an,

‘k zet volle glaezen klaor,

kom we genieten en jow bin et weerd.

          Dichter dan dichterbi’j,

          en hiel vertrouwd veur mi’j,

          jow en ik saemen, dus wat wi’j’ nog meer…

 

1.

Buten is ’t koold

en buten is ’t drok,

ziej’ daor de wereld.

die zocht naor ’t gelok.

Tegen mi’j an

zo veilig en teer,

‘k vuul je oprechte vertrouwen hieltied meer.

2.

Buten is haost,

geveer en geweld,

ziej’ ze strieden

om macht en om geld?

Wees mar niet bang’

kroep tegen mi’j an,

geef me je waarmte zo lang’ as et kan.

 

Refrein II

Koester mien woorden mar,

vuul al mien strelen mar,

laot je mar zweven deur keerslocht en klaank.

Sluut beide ogen mar,

droom alle dromen mar,

soeze mar vot hier bi’j mi’j op ‘e baank.

          Dichter dan dichterbi’j,

          en hiel vertrouwd veur mi’j,

          d’r is mar ien woord en dat is van ‘daank’.

 

(De wieze van et refrein: ‘Sluit alle deuren maar’, uut de musical ‘Joseph and his amazing technicolor dreamcoat’)

 

 

Et beweren van appels en peren

Op et plattelaand haj’ op de hiemen vroeger nogal wat appel- en perebomen staon. De vruchten d’r van kwammen diels in de weckflesse, en een diel wodde beweerd op een koel plak, bi’jglieks in de kelder. Mar ok een diel wodde toemaekt en dan dreugd op ‘e kachelplaete van de kookkachel of in de ovend. Al mit al was dat nogal een dreeg warkien. Ie hadden aenlik gien ruumte genoeg, want zo groot was de kachelplaete niet.

Soms wodde de plaetselike bakker om hulpe vraogd. As et broodbakken daon was, was de grote ovend ja nog lekker op temperetuur. Et kostte ok gien geld, mar de bakker mos de boel wel in de gaten holen. Et gebeurde wel es dat de appelties nao de tied wat an de donkere kaante weren. Dan was de ovend aenlik nog te waarm west, of ze hadden d’r krek te lange in zeten. Dan weren ze nao et opwellen niet lekker meer, mar smaekten wat braanderig. Mar meerstal was et wel goed en was et een lekkere wintergruunte.

Gegevens Koop Gorte, Stellingwarver Spreukekelinder 2003