Snuffelkursus Stellingwarfs op ‘e helte

DSC_0787, Snuffelkursus

De Snuffelkursus Stellingwarfs, die kotleden uut aende gong, is ondertussen op ‘e helte. Disse ni’je kursus, een initiatief van de Stellingwarver Schrieversronte, is veural bedoeld veur ni’je inwoners van de Stellingwarven. Die kun deur et grote anbod an onderwarpen op een mooie meniere in de kunde kommen mit wat et gebied an eigen streekkultuur te bieden het. Tiedens de twiede aovend vertelde dr. Henk Bloemhoff over (de geschiedenis van) et Stellingwarfs. Jan Koops en Jan de Vries, de auteurs van et boek De dörpen van Stellingwarf in oolde beelden, vertelden an de haand van een prachtige powerpointprissentaosie over de 39 dörpen van Stellingwarf. Op de foto links Henk Bloemhoff, rechts Jan Koops en Jan de Vries. Veur de foto zorgde Lenus van der Broek. De Snuffelkursus is nog op donderdagaovend 10 oktober en wodt mit een exkursie in een netuurgebied ofsleuten op zaoterdagmorgen 19 oktober.

Vanof 26 september kuj’ bi’j de Schrieversronte: Snuffelen in Stellingwarf

Wie dot mit an de Snuffelkursus Stellingwarfs?

image3

Vaeke weten meensken die in oonze regio kommen te wonen niet wat d’r hier allemaole te doen is. Dat gelt mit naeme veur de aktiviteiten op et gebied van de Stellingwarver streekkultuur en geschiedenis. De Stellingwarver Schrieversronte orgeniseert daoromme kommende haast veur et eerst de ‘Snuffelkursus Stellingwarfs’. Meensken die an die kursus mitdoen gaon kun tiedens vier dagdielen even an verschillende facetten van et Stellingwarver arfgoed snuffelen. De kursus wodt holen in et gebouw van de Stellingwarver Schrieversronte in Berkoop en is op:

Donderdagaovend 26 september (van 19.30 tot 21.30 ure):

image6-001

1. Algemiene geschiedenis, deur Geert Lantinga

2. Stellingwarver proza en poëzie, deur Jannes Westerhof, Johan Veenstra en Christine Mulder

Donderdagaovend 3 oktober (van 19.30 tot 21.30 ure):

image0

1. De geschiedenis van et Stellingwarfs, deur dr. Henk Bloemhoff

2. De dörpen van Stellingwarf in oolde beelden, deur Jan Koops en Jan de Vries

Donderdagaovend 10 oktober (van 19.30 tot 21.30 ure):

IMG_4919

1. De geschiedenis van et laandschop, deur drs. Dennis Worst

2. De netuur van Stellingwarf, beeldreportage deur Ruurd Jelle van der Leij

Zaoterdagmorgen 19 oktober (van 9.00 tot 11.30 ure):

Exkursie in een Stellingwarfs netuurgebied, o.l.v. Freddie de Vries

 

De kosten bin € 30,00 per persoon, koffie/thee inbegrepen

Anmelden kan bi’j de Stellingwarver Schrieversronte in Berkoop. Dat kan per mail: info@stellingwarfs.nl, of deur even te bellen mit et kantoor: 0516-451108

Stellingwarver Schrieversronte

Willinge Prinsstraote 10

8421 PE Berkoop/Oldeberkoop

info@stellingwarfs.nl, 0516-451108

 

Foto’s: Sietske Bloemhoff

Kursus ‘Stellingwarfs veur beginners’ gaot op 12 november uut aende

Kursus ‘Stellingwarfs veur beginners’

 ‘Waoromme schrieven we ‘schrieven’ en niet ‘schriev’n’ of ‘schrievm’?

‘Is et now volle maene of volle maone?

 Aj’ graeg mit et schrieven van et Stellingwarfs an de slag gaon willen, kuj’ vanzels flink wat infermaosie in verschillende boeken en op de Stellingwarver webstee StellingPlus vienen. Mar et schrieven van et Stellingwarfs leer ie veural deur et vule te doen. Ie kommen dan liekewel ok talloze zaeken tegen waor aj’ wel graeg wat meer van weten willen zollen. Waoromme schrieven we ‘schrieven’ en niet ‘schriev’n’ of ‘schrievm’? Wanneer schrieven we ‘ao’ en wanneer ‘ae’? En waor komt dat Stellingwarfs now aenlik weg, we wonen toch in Frieslaand? Veur et antwoord op zokke en veul meer aandere vraogen orgeniseert de Stellingwarver Schrieversronte de kursus ‘Stellingwarfs veur beginners’. De kursus geft butendat een boel meensken die al wat mit et Stellingwarfs in de weer binnen een mooi steuntien in de rogge.

Behalven daj’ bi’j disse kursus dus aorig mit de schrieveri’je an de slag binnen, is d’r ok ommedaenken veur et praoten in et Stellingwarfs. Butendat koj’ in de kunde mit de geschiedenis en volkskunde van Stellingwarf en is d’r andacht veur de biezundere ligging van de streek.

De kursus ‘Stellingwarfs veur beginners’ bestaot uut tien lesaovens en begint op deensdagaovend 12 november. De kursus is van half achte tot half tiene en wodt geven in et gebouw van de Schrieversronte in Berkoop. De kosten bin € 75,00, dat is inklusief koffie of thee mit wat d’r bi’j.

Meensken die interesse hebben kun et beste even bellen mit et kantoor van de Schrieversronte: 0516-451108, of mailen naor: info@stellingwarfs.nl.

Kursus Laandschopsgeschiedenis

Lende mit boswal

Kommende 5 september gaot d’r in Else de ni’je kursus Laandschopsgeschiedenis uut aende. Et gaot om ien van de vuuf kursussen die de kommende haast anbeuden wodden deur de Stellingwarver Schrieversronte. De ni’je kursus Laandschopsgeschiedenis is ontwikkeld deur Dennis Worst uut Oosterwoolde en is bedoeld om de dielnemers op weg te helpen bi’j et kennismaeken en/of veerder ontdekken van de geschiedenis van et laandschop om heur henne. De ni’je kursus zal de eerste keer geven wodden in Else, et dörp daor Worst van oorsprong wegkomt. Alle gegevens over disse biezundere kursus bin te lezen deur even te klikken op:

Programmafolder Cursus Landschapsgeschiedenis2 (25-07-2013)

Ofslutende exkursie Kursus Stellingwarfs veur beginners

image_00019

Krek as alle ere jaoren wodde ok dit jaor de kursus ‘Stellingwarfs veur beginners’ weer ofsleuten mit een prachtige exkursie o.l.v. kursusleider Geert Lantinga uut Wolvege (hielemaole links op ‘e foto). De exkursie op oflopen 13 meie was dit keer in de Lendevallei bi’j Wolvege en vul ok now weer ommeraek in de smaek! Alle kursisten en zowat alle kursusleiders weren van de perti’j; kursiste Trudy Fraterman van Ni’jberkoop maekte tiedens de exkursie een riegeltien mooie foto’s:

image_00013

image_00017

image_00003

image_00021

image_00005

Wie graeg de kursus ok een keertien volgen wil, dat kan vanzels. De kursus mit veural ommedaenken veur de Stellingwarver tael en kultuur gaot ok dit naojaor weer uut aende, de eerste kursisten hebben heur now al opgeven. En vanzels is d’r dan ok in et veurjaor van 2014 weer zoe’n prachtige exkursie waor aj’ dan an mitdoen kunnen! Veur meer infermaosie kuj’ terechte bi’j de Stellingwarver Schrieversronte in Berkoop. Dat kan deur even een mailtien te sturen naor info@stellingwarfs.nl, of deur even te bellen naor 0516-451108. Et kantoor is los van maendag t/m donderdag.